EDUKASAUN, COVALIMA

Edukasaun Covalima husu MEJD konstrui eskola paralela Salele no Sanfuk

Edukasaun Covalima husu MEJD konstrui eskola paralela Salele no Sanfuk

Diretór Servisu Edukasaun Munisípiu Covalima, Francelino Freitas Carvalho. Imajen Tatoli/Celestina Teles.

COVALIMA, 10 agostu 2023 (TATOLI)–Diretór Servisu Edukasaun Munisípiu Covalima, Francelino Freitas Carvalho, husu Ministériu Edukasaun Juventude no Desportu (MEJD) atu konstrui eskola paralela Salele no Sanfuk iha munisípiu Covalima.

“Governu presiza konstrui uma foun ba eskola sekundáriu klase paralela Sanfuk no Salele. Tanba, edukasaun hamutuk ho ita-nia autoridade identifika fatin atu konstrui eskola klase paralela iha Salela, postu administrativu Tiloma,” Francelino Freitas Carvalho hateten iha salaun Eskola Sekundáriu Jerál Públiku Suai.

Tuir nia, ba oin eskola ida-ne’e sei entrega ba eskola paralela ho nia estudante kada eskola paralela na’in-400 resin.

Hatan ba kestaun ne’e, Sekretáriu Estadu Ensinu Sekundáriu Jerál Ensinu Tékniku Vokasionál, Domingos Lopes Lemos, hateten nia parte sei haree rekezitu sira atu estabelese eskola paralela rua iha munisípiu Covalima ne’e.

“Kona-ba eskola paralela rua, estudante barak, ita haree to’ok kritéria ne’e oinsá. Maibé, loke tiha eskola paralela atu taka fali ne’e lae, tanba ida-ne’ebé mak loke mantein no Misistériu sei haree nia rekezitu-sira prienxe ka lae, tanba loke eskola ne’e la’ós hanesan loke kioske,” nia esplika.

Governante ne’e hateten, loke eskola presiza haree rekursu umanu no labele dada profesór hodi ba hanorin, tanba kontribuisaun inan-aman hodi selu ba profesór liu fulan neen (6) submete   karta ba Ministériu atu tau konsiderasaun ba profesór reklamante-sira.

Ho nune’e, nia husu ba kargu xefia atu redús profesór sira hanorin volontáriu iha eskola sira, nune’e bele rezolve lai profesór ne’ebé antes hahú hanorin iha tinan 2012 to’o ohin loron, sira-nia kontratu no sei rezolve nafatin ho fazeadamente.

Antes ne’e, iha 16 novembru 2022, Administradór Covalima Francisco de Andrade husu ona Governu atu konstrui eskola paralela rua iha munisípiu Covalima, tanba númeru estudante Eskola Sekundáriu Jerál Públiku Suai ne’e barakliu, entaun sala-de-aula la sufisénte atu akumula estudante sira no iha prosesu aprendijazen iha sala-de-aula estudante liu na’in-35.

Eskola Sekundáriu Jerál Paralela ne’e estabelese iha eskola Bázika Sentrál (EBC, sigla portugés) Sanfuk, suku Camnasa, postu administrative Suai no iha postu administrativu Tilomar, munisípiu Covalima.

Jornalista  : Celestina Teles

Editór        : Cancio Ximenes

iklan
iklan

Leave a Reply

iklan
error: Content is protected !!