Falur husu militár 152 gradua formasaun sarjentu atu disiplina
DILI, 10 agostu 2023 (TATOLI) – Xefe Estadu Maiór Jerál FALINTIL-Forsa Armada Timor-Leste, Tenente Jenerál Domingos Raul Falur Rate Laek, husu ba militár 152 ne’ebé gradua ona ba postu serjentu atu mantein disipliña no servisu tuir orden komandu atu dezenvolve institusaun F-FDTL sai di’ak liután.
“Ita-bo’ot sira-nia kna’ar nu’udar militär tenke kontribui direta no indiretamente hodi mantein orden disipliña no servisu makas hodi sai ezemplu iha ba família, sosiedade no instituisaun”, Falur hateten iha nia diskursu iha serimónia graduasaun militár 152 ne’ebé graduadu ba postu serjentu ne’ebé hala’o iha Sentru Instrusaun Nicolau Lobato, Metinaro, kinta ne’e.
Nia dehan, sai militár tenke iha responsablidade no tenke tau iha neon katak durante oras 24 nia-laran tenke prontu nafatin hodi marka prezensa ba komandante sira.
Iha biban ne’e, Falur husu ba militár 152 atu kontinua treinu nafatin liuliu treinu militár, arte no treinu ho seguru hodi hasoru situasaun ohin loron nian.
“Ita moris iha mundu ne’ebé ho ameasa, risku no senáriu kompleksu tebes. Ho nune’e, ita bo’ot sira tenke prepara atu hasoru dezafiu hotu ho matenek no aten-brani”,nia dehan.
“Militár ne’ebé matenek mak militár ne’ebé saudavél iha isin-lolon (fiziku), reziliente iha kakutak no komprometidu iha fuan atu hadomi no defende nia rain,” nia adianta.
Xefe Estadu Maiór Jenerál Forsa Armada ne’e agradese ba familia hosi militár graduadu nain 152, tanba ho familia sira nia apoiu tamak militár nain-152 bele konklui sira nian formasaun ba serjentu ho di’ak no okonsege gradua ba deviza serjentu.
“Ba família graduadu sira, obrigadu ba imi-hotu nia-apoiu no esforsu ne’ebé kontribui ba graduadu sira nian. Sé laiha imi-nia domin, sé la iha imi nia tulun, ohin sira la konsege sira-nia formmasaun ne’e”, nia agradese.
Falur parabeniza militár 152 ne’ebé konklui ona sira-nia formasaun durante fulan haat nia-laran ne’ebé ohin konsege graduadu ona ba postu serjentu.
Iha fatin hanesan, Diretór Kursu Formasaun Serjentu, Kapitão Infantaria Francisco do Rêgo, husu ba militár sira kontinua hatudu profisionalismu no maturidade hanesan sarjentu ida iha kareira militár.
“Ha’u fiar katak imi sei hala’o imi-nia kna’ar hotu ho di’ak, dala ida tan ba Sargentu foun sira keta haluha mós hatudu imi-nia lealidade, pontualidade disipliña, kreatividade no pro-ativu iha idak idak nia komponente no unidade”, nia afirma.
Kursu serjentu ne’e kompostu hosi militár nain 153, maibé durante kursu iha militár, ida mak la konsege konklui nia formasaun tanba falta iha kursu no la iha justifikasaun.
Hela na’in-152 mak konklui konsege kursu ne’e. hosi númeru 152 ne’e, mane na’in 141, feto 12, formasaun la’o fulan haat nia-laran no fulan haat militár sira apreende teória, tátiku inklui ezersísiu militár.
Jornalista: Natalino Costa
Editór : Zezito Silva
