DILI, 10 agostu 2023 (TATOLI) – Diretór Ezekutivu Fundasun Klibur Domin Joaquim F Soares hasoru malu ho Diretór Servisu Autonómu Medikamentu Ekipamentu Saúde (SAMES), Empreza Públika (SAMES,IP) Santana Martins hodi ko’alia kona-ba kooperasaun mútua.
Objetivu husi vizita ida ne’e mak ko’alia kona-ba oinsa atu Fundasaun Klibur Domin bele serbisu hamutuk ho SAMES iha futuru, hodi bele apoiu malu di’ak liután, kontribui ba melhoramentu servisu saúde públiku
Diretór Santana liuhosi komunikadu apresia inisiativa Klibur Domin nian ne’ebé di’ak hakarak servisu hamutuk ho SAMES hodi fó assiténsia ba ita-nia povu sira.
“Ba oin ita sei servisu hamutuk di’ak liután hodi tulun ita-nia povu sira ne’ebé moras”, nia dehan.
Parte seluk, Joaquim agradese tanba bele hasoru malu ho SAMES hodi ko’alia kona-ba servisu hamutuk no vizita direta ba armajen sentrál SAMES nian hodi haree direta produtu médiku nian.
“Ami sei buka hatene barak liután informasuan sira tanba públiku sira daudaun ne’e sempre hanoin negativu de’it mai SAMES katak ai-moruk sira ne’ebé mak falta ne’e, hotuhotu kulpa SAMES nian, maibé presiza mós buka hatene informasaun barak atu bele komprende didiak hodi bele apoiu buka solusaun ba problema sira no fukun sira ne’ebé síklu Jestaun Farmaseútika”, dehan Diretór Joaquim.
Jornalista: Hortencio Sanchez
Editór : Zezito Silva
