Governu louva inan-aman kontribui sosa komputadór ba ESJP Suai
COVALIMA, 10 agostu 2023 (TATOLI)–Governu liuhosi Sekretáriu Estadu Ensinu Sekundáriu Jerál Ensinu Tékniku Vokasionál, Domingos Lopes Lemos, louva estudante nia inan-aman sosa komputadór no sosa rede (arame) moru nian haleu Eskola Sekundáriu Jerál Públiku Suai, iha munisípiu Covalima.
“Kona-ba inan-aman kontribui hodi sosa komputadór ba eskola, ita tenke aplaus tanba úniku eskola Sekundáriu Jerál Públiku Suai. La’ós tanba governu gava eskola lae, maibé realidade munisípiu seluk la akontese estudante nia inan-aman sosa komputadór ba eskola,” Sekretáriu Estadu Ensinu Sekundáriu Jerál Ensinu Tékniku Vokasionál, Domingos Lopes Lemos, hateten liuhosi diskursu iha salaun ESJP Suai, kuarta ne’e.
Governante louva inan-aman ne’e, bazeia ba relatóriu ne’ebé Diretór Servisu Edukasaun Munisípiu Covalima, Francelino Freitas Carvalho, relata ba Sekretáriu Estadu Ensinu Sekundáriu Jerál Ensinu Tékniku Vokasionál.
Tanba, nia dehan, inan-aman kontribui osan $2.00 kada fulan ne’e di’ak, importante bele rezolve nesesidade eskola balun no tenke jere osan ho di’ak duke buat hotu husu ba Ministériu, tanba Ministériu haree eskola iha territótiu Timor laran ne’e mak problema.
Governante ne’e hatutan, iha Orsamentu Retifika Governu prevee orsamentu atu sosa komputadór tanba eskola ensinu sekundáriu iha dixiplina multimedia teoria no prátika, nune’e distribui ba eskola sira-ne’ebé presiza planu ho neneik mak sei atinje.
Diretór Servisu Edukasaun Munisípiu Covalima, Francelino Freitas Carvalho, hateten eskola konstrui moru haleu hodi dada arame iha eskola Sekundáriu Jerál Públiku Suai, tanba kontribui osan hosi inan-aman no sosa komputadór unidade-30.
Tuir dadus, estudante iha Eskola Sekundáriu Jerál Públiku Suai hamutuk 2600-resin ho totál professor hamutuk 90-resin.
Entretantu, totál eskola iha Munisípiu Covalima hamutuk 145 ne’ebé kompostu hosi eskola pre-eskolár públiku no privadu, ensinu báziku ho eskola báziku filiál, eskola sekundáriu jerál Públiku no privadu, eskola sekundáriu tékniku vokasionál públiku no privadu, ho totál estudante 22,508 no ho profesór permanente no kontratadu hamutuk 1,114.
Jornalista : Celestina Teles
Editór : Cancio Ximenes
