VIQUEQUE, 10 agostu 2023 (TATOLI)—Servisu Agrikultura Viqueque destaka ona ekipamentu pezadu hodi normaliza irrigasaun hitu iha munisípiu Viqueque ne’ebé hetan estragu hosi udan-boot no inundasaun foin lalais ne’e.
“Ami esforsu destaka ekipamentu hodi normaliza irrigasaun hitu ne’ebé a’at tanba mosu sedimentasaun, nune’e daudaun ne’e bee ne’ebé kanaliza ba natar sira la’o normál filafali ona,” Diretór Servisu Agrikultura Viqueque, Fernando Joaquim, informa ba Agência Tatoli, iha ninia knaar fatin, Beloi, kinta ne’e.
Diretór MAP Viqueque relata, irrigasaun ne’ebé a’at totál iha postu Uatucarbau no Uatulari, enkuantu iha postu Viqueque Vila, irrigasaun a’at tanba mota sobu no balun mosu sedimetasaun, nune’e eskavatór konsege hadi’a ona.
Notísia relevante : Servisu MAP Viqueque identifika irrigasaun haat hetan estragu
Tuir dadus, irrigasaun irrigasaun hitu ne’ebé halo normalizasaun maka hanesan irrigasaun Lauadare iha suku Irabin de Baixo postu Uatucarbau ho medida naruk metru 500 ne’ebé fornese bee ba natar ektare 80 no benifisia ba uma-kain 100, irrigasaun parte Borala ho medida naruk metru 5.400 fornese bee ba natar baidubu ektare 80 no benefisia ba uma-kain 692, irrigasaun Sartebar naruk metru 300 iha área suku Bahatata, Loi-Ulo no Iribin de Cima postu Uatucarbau natar Sartebar hamutuk ektare 28,25 no benefisia uma-kain 30, irrigasaun Bebui postu administrativu Uatulari normaliza metru 1.000 ne’ebé fornese bee ba natar ektare 1.100, benefisia ba uma-kain 1.460, irrigasaun Ketunua postu Uatulari naruk metru 100 ba natar Ketunua ektare 75 benefisia uma-kain 58.
Iha suku Bahalara Uain postu Viqueque Vila iha irrigasaun haat hanesan Kiar Dekun ho naruk metru 125 fornese bee ba natar ektare 28 no benefisia uma-kain 20, irrigasaun Kae Laran medida 122, ba natar Kae Laran ektare 26 benefisia ba uma-kain 18, irrigasaun Uelaku Bein metru 164 fornese ba natar Uelaku Bein ektare 71 no benefisia ba uma-kain 70 no irrigasaun Uelele Akar metru 155 ba natar Uelele Akar ektare 43.5 no benefisia uma-kain 28 no irrigasaun Uetodo iha suku Luca, postu Viqueque Vila ho naruk metru 25 fornese bee ba natar ektare metru 62,5 no benefisia uma-kain 126.
“Iha irrigasaun tolu maka ami kontinua tau ba planu atu normaliza tanba irrigasaun hirak ne’e hetan hotu estraga hosi udan boot. Iha tumpu badak ami sei destaka fali ekipamentu pezadu ne’ebé hosi Ministériu Agrikultura no Peska (MAP) ba halo normalizasaun,” nia relata.
Enkuantu, irrigasaun tolu ne’ebé seidauk halo normalizasaun maka hanesan Irrigasaun Ué Kandi Oan iha suku Luca postu Viqueque ba natar Aimanas ektare 53 no benefisia uma-kain 62, iha suku Uma-K’ik irrigasaun hamutuk rua maka hanesan Tahu Bein ho medida metru 168 ba natar Tahu Bein fornese ba natar ektare 9,5 benefisia ba uma-kain 18 no irrigasaun Uelaku Ten ho medida naruk metru 30 ba natar ektare 8, benefisia ba uma-kain sia no irrigasaun Nu’u Sare Laek ho medida naruk metru 25 fornese bee ba natar Nu’u Sare ektare metru 6,5 no benefisia ba uma-kain 12.
Jornalista : Vitorino Lopes da Costa
Editora : Julia Chatarina
