DILI, 11 agostu 2023 (TATOLI) – Universidade Nasionál Timor Lorosa’e (UNTL) nia Fakuldade Siénsia Sosiál (FSS) realiza yudisium ba finalista na’in-220. Iha serimónia ne’e Dekanu FSS, Camilo Ximenes, husu ba finalista sira atu labele orgullu ho títulu ne’ebé hetan, maibé tenke hatudu responsabilidade iha sosiedade nu’udar alumni universidade nian hodi partisipa iha atividade sira ne’ebé maka lori dezenvolvimentu ba país ne’e.
“Ita-boot sira hahú ohin bá oin tenke hatete ba ida-idak nia-aan katak sei iha responsabilidade boot atu asume papél ida iha sosiedade nia leet. Atu kuída nafatin almamater universidade nian hodi prontu serbisu hamutuk ho komunidade”, Camilo apela iha salaun Katedrál, Vila Verde, ohin.
Nia salienta realidade hatudu estudante UNTL barak maka depois akaba tiha sira-nian estudu hela de’it iha uma no nia espera ba finalista sira iha tinan ida ne’e sei la akontese hanesan. “Buka halo esforsu tomak hodi enkaixa aan iha sosiedade nia leet hodi halo buat ruma”.
“Ha’u dehan ba imi hotu katak hahú ohin bá oin, imi maka tenke halo ona esforsu ba imi-nia aan rasik hodi buka serbisu atu ajuda nesesidade família nian, nune’e bele hakmaan todan ne’ebé inan-aman sira enfrenta durante ne’e”, afirma.
Dirijente ne’e husu finalista sira atu kria relasaun ho universidade, liuliu fakuldade ne’ebé sira hola parte atubele iha nafatin komunikasaun ba malu.
“Karik imi hasoru difikuldade iha serbisu fatin relasiona ho asuntu serbisu nian, imi bele halo konfirmasaun ho fakuldade atubele hetan update buat ne’ebé foun hodi bele hadi’a ita-nian kurríkulu. Labele ohin imi sai ona alumni lakon kedan kontaktu”, sujere.
Finalista FSS na’in220 ne’ebé simu ona yudisium ne’e mai husi departamentu hitu, kompostu husi Komunikasaun Sosiál ema na’in-67, Siénsia Polítika 44, Polítika Públika lima, Relasaun Internasionál 49, Dezenvolvimentu Komunitáriu 15, Inkluzaun Sosiál ualu no Administrasaun Públika 32.
Finalista departamentu Komunikasaun Sosiál José Lobo afirma katak mensajen ne’ebé dekanu fó hanesan asaun ida ne’ebé fanu finalista 220 ne’ebé simu ona yudisium atu prepara aan nafatin hodi sai ema intelektuál ida ho kualidade atu tama iha prosesu dezenvolvimentu país ida ne’e.
“Ha’u konkorda tebes saida maka Dekanu husik hela tanba ida ne’e maka realidade moris iha sosiedade. Tenke prepara aan atu brani enfrenta obstákulu sira, nune’e bele ajuda komunidade sai barani hodi hateke bá oin. Tanba ita maka jerasaun foun ne’ebé mak atu kontinua dezenvolvimentu nasaun ida ne’e”, realsa.
Nu’udar finalista komunikasaun sosiál, José Lobo sei hala’o papél ho responsabilidade atu ajuda sosiedade sira liuhusi fahe tutan informasaun ba komunidade sira atu nune’e hotu-hotu bele kontribui ba nasaun ne’e ninia di’ak ba futuru.
Jornalista: Tomé Amado
Editora: Maria Auxiliadora
