OMS konsidera susubeen inan kontribui hadi’a nutrisaun iha Timor-Leste
BAUCAU, 11 agostu 2023 (TATOLI) – Organizasaun Mundiál Saúde (OMS) konsidera susubeen-inan kontribui hadi’a nutrisaun ba labarik sira iha Timor-Leste.
Reprezentante Organizasaun Mundiál Saúde (OMS) iha Timor-Leste, Arvind Mathur, kongratula governu sentrál no lokál ne’ebé fó prioridade ba bebé no inan hodi hadi’a nutrisaun iha loron selebarasaun semana mundiál susubeen-inan.
“Ho susu mak intervensaun aas liu ba labarik nia dezenvolvimentu, susubeen-inan na’in la’ós de’it fonte nutrisaun ne’ebé di’ak maibé hametin ligasaun entre inan no oan,” Reprezentante OMS hateten iha sede suku Gariuai, sesta ne’e.
Arvin Mathur, argumenta, risku ba labarik sira-ne’ebé la konsume susubeen-inan nian iha poténsia aas lakon vida bainhira kompara ho bebé ne’ebé konsume susubeen-inan bainhira moris.
OMG kontinua enkoraja inklui kampaña kona-ba susubeen-inan iha Timor-Leste tanba nu’udar ai-haan saudável ba bebé sira liuliu foka ba nesesidade hodi hetan apoia ba inan sira iha fatin serbisu tuir tema selebarasaun semana mundiál susubeen-inan.
“Obstákulu sira-ne’ebé feto no família sira halo atu atinje objetivu hodi fo susubeen-inan tenke rezolve hanesan apoia iha fatin serbisu nu’udar xave inportante,” Arvin Mathur akresenta.
Polítika importante ne’ebè presiza halo mak hanesan lisensa maternidade liuliu durante prioridade fulan-neen, fornese fasilidade fo susu ne’ebé adekuadu no fo tempu sufisiente ba inan-sira atu kontinua fo susu ba bebé.
OMS garante Timor-Leste sei implementa hodi tulun hamenus influénsia negativu ba komersializasaun produtu susu-been formula nune’e bele redus má-nutrisaun no dezenvolvimentu nasaun ho saudável.
Jornalista : Natalino Belo
Editór : Evaristo Soares Martins
