PAM husu Governu apoia orsamentu kampaña susubeen-inan iha Baucau
BAUCAU, 10 agostu 2023 (TATOLI) – Autoridade Administrasaun Munisipál Baucau husu Governu Sentrál apoia orsamentu liuhosi planu anúal hodi kria programa kampaña susubeen-inan ba komunidade.
Prezidente Autoridade Munisipál (PAM) Baucau, Olivio ‘Bou-lesa’ Freitas, esplika, atu hasa’e taxa persentajen bebé konsumu susubeen-inan iha munisípiu Baucau presiza integra ba programa liuhosi planu asaun anuál munisipál nune’e iha kompeténsia legal ne’ebé hanaran partisipasaun definisaun polítika no asaun iha saúde públika.
“Presiza tebes apoia hosi Governu Sentrál iha desizaun polítika no alokasaun orsamentu ba asaun sira hanesan kampaña ka sosialiazaun iha área rurál no urbana,” Prezidente Autoridade Munisipál Baucau hateten iha sede suku Gariuai, sesta ne’e.
Alende ne’e, liuhosi apoia orsamentu bele utiliza ba formasaun iha serbisu, klase pre-natal no autoriza inan traballadór sira atu fo susu-been ba labarik sira.
Tuir dadus sensus uma-kain tinan-2022, totál populasaun iha munisípiu Baucau hamutuk 134.878 kompostu idade 0-19 hamutuk pursentu 47.2, labarik idade tinan-0 to’o 4 hamutuk 15.995 fahe ba feto hamutuk pursentu 48.4 no mane pursentu 51.6.
Hosi totál kategoria idade labarik, bazea ba peskiza ai-haan nutrisaun hosi Ministériu Saúde (MS) tinan-2023, persentajen inan ne’ebé fo susu-been ekluzivu ba bebé hamutuk pursentu 70.3, inan fo susu-been ba bebé idade to’o tinan-ida pursentu 84 no bebe tinan-rua pursentu 39.
“Ema bele sobre vive bainhira laiha osan no rikeza maibé labele terus bainhira tanba de’it laiha kondisaun di’ak ba saúde,” Bou-Lesa akresenta.
Bou-lesa konsidera rikeza iha Timor-Leste ne’ebé valor a’as liu mak bebé tanba nu’udar jerasaun kontinuadór iha futuru hodi lori dezenvolvimentu ba nasaun nune’e presiza fó atensaun hodi redús taxa mortalidade ba labarik, hasa’e nutrisaun no kombate moras seluk hanesan dengue.
Nune’e, alende susubeen-inan, labarik sira mos presiza iha atendementu kuidadu saúde ho di’ak, konsumu hahaan nutritivu no bee-moos inklui saniamentu ne’ebé igiene iha Timor-Leste.
Jornalista : Natalino Belo
Editór : Evaristo Soares Martins
