iklan

MUNISÍPIU, SAÚDE, VIQUEQUE

Postu saúde Bibileo rejista moras ISPA 490 durante fulan-hitu

Postu saúde Bibileo rejista moras ISPA 490 durante fulan-hitu

Responsável postu saúde Kararas, suku Bibileo, Jacop Soares Sarmento. Imajen Tatoli/Vitorino Lopes sa Costa

VIQUEQUE, 11 agostu  2023 (TATOLI)Postu saúde área Kararas, suku Bibileo, postu administrativu Viqueque Vila, munisípiu Viqueque, rejista moras Insfesaun Vias Respiratóriu Aguda (ISPA) hamutuk 490, durante fulan-hitu, hahú janeiru to’o jullu tinan ne’e.

“Ami haree maioria labarik hosi tinan 5 mai kraik mak sofre moras ne’e, ba ema boot númeru ladún.  Ami mós rejista moras hanesan isin katar  hamutuk 79, maibé moras seluk sira iha ne’e ami haree númeru kazu ladún,” Responsável postu saúde Kararas, suku Bibileo, Jacop Soares Sarmento, relata ba jornalista sira iha postu saúde, sesta ne’e.

Nia dehan, moras ISPA rejista ho númeru a’as tanba kauza hosi klima rai malirin, hemu bee matak no rai rahun tanba dala barak abitante sira lakohi uza máskara nune’e fó impaktu ba saúde.

“Nune’e, bainhira pasiente sira mai konsulta, ami fó tratamentu ho ai-moruk paracetamol no vitamina. Depois bainhira ami observa maka akompaña ho mear, ami fó ai-moruk xarope ba pasiente sira konsumu hodi kura moras ISPA,” nia akresenta.

notísia relevante : Postu saúde Ulusu Viqueque rejista moras ISPA 284

Aleinde ne’e postu saúde Kararas dadaun ne’e enfrenta menus estoke ai-moruk hanesan antibiótiku metronidazole tablet laiha, cloxacillin estoke limitadu, antisteroid kompostu hosi predniso tablet estoke limitadu no antianalgetik kompostu hosi diclofenac laiha, ibuprofen laiha no parcetamol estoke limitadu.

“Durante ne’e ami identifika ai-moruk parcetamol limitadu, ne’ebé bainhira pasiente sira isin manas mai ami  fó musan haat kada ema ida naran hodi pasiente sira bele hatun isin manas. Nune’e mós agora daudaun stock ai-moruk metronidazole laiha no diclofenac laiha, maibé ai-moruk sira ne’ebé estoke laiha ne’e importante tebes hodi halo atendementu ba pasiente sira. Ami mós hato’o ona relatóriu ai-moruk lba Servisu Saúde Viqueque, maibé sira dehan ai-moruk hosi SAMES sei mai tarde,” nia tenik.

Nune’e mós, postu saúde Kararas menus pesoál saúde, agora iha na’in-tolu maka fó atendementu abitante sira ne’ebé halo tratamentu.

“Ami iha ne’e problema liu maka pesoál saúde ami agora iha na’in-tolu de’it, tanba ne’e presiza aumenta rekursu hodi fó tratamentu ba abitante sira tanba iha ne’e médiku mós laiha. Tuir kritéria kada postu saúde tenke iha médiku ida, enfermeiru rua, parteira ida, farmasita ida, saúde públika ida no laboratóriu ida, maibé ami iha ne’e la prienxe ba kritériu sira,” nia tenik.

Postu saúde Kararas iha pesoál saúde na’in-tolu, kompostu hosi enfermeiru na’in-ida, saúde públika na’in-ida no parteira na’in-ida, ne’ebé fó atendimentu kada loron, hahú hosi segunda to’o sesta halo atendimentu ba abitante sira iha suku Bibileo inklui abitante suku Uma-Ki’ik no suku Uaimori ne’ebé hela besik iha área Kararas.

Jornalista      : Vitorino Lopes da Costa

Editora            : Julia Chatarina

iklan
iklan

Leave a Reply

iklan
error: Content is protected !!