STAE Baucau hahú rekruta funsionáriu hodi prepara eleisaun suku
BAUCAU, 10 agostus 2023 (TATOLI) – Sekretariadu Tékniku Administrasaun Eleitorál (STAE) Munisipál Baucau hahú halo rekrutamentu ba funsionáriu kontratadu hodi apoia ba preparasaun realiza eleisaun suku.
Diretór STAE Munisípiu Baucau, Natividade Freitas, esplika, kada eleisaun liuhosi faze tolu hanesan antes eleisaun resensiamentu no atualiza baze dadus, eleisaun hanesan votasaun no depois eleisaun mak kontajen votu inklui fó-sai rezultadu.
“Preparasaun eleisaun suku ne’ebé tuir planu iha fulan-outubru mak ita hahu halo rekrutamentu ba operadór sistema no asisténsia tékniku,” Diretór STAE Baucau hateten iha Vila Nova, kinta ne’e.
Prosesu rekrutamentu ba operadór sistema no asisténsia tékniku iha ona faze teste orál ne’ebé kada postu sei koloka ema na’in-rua inklui sei kontinua ba rekrutamentu ba ofisiál pesoál apoia suku na’in-ida no aldeia na’in-rua.
Funsaun ofisiál pesóal apoia suku inklui aldeia sei tau matan ba prosesu eleisaun suku ne’ebé sei realiza iha kada aldeia tanba sei hili xefe aldeia antes halo kontajen jerál iha suku.
Durasaun serbisu operadór sistema no asisténsia tékniku fulan-haat tanba resensiamentu eleitorál no atualiza baze dadus iha kada postu, enkuantu ba ofisiál apoia suku sei kontratu fulan-rua no aldeia nian sei kontratu loron-lima.
“STAE nasionál orienta atu halo selesaun dokumentu, halo preparasaun ba planu no sei submete ba nasionál,” Natividade Freitas.
Nu’udar apoia tékniku no responsável órgaun eleitorál, STAE Baucau kontinua halo koordenasaun ho Autoridade Administrasaun Munisipál nu’udar na’in inklui parte seguransa Polísia Nasionál Timor-Leste (PNTL) Baucau relasiona ho realizasaun eleisaun suku.
Jornalista : Natalino Belo
Editór : Evaristo Soares Martins
