VIQUEQUE, 12 agustu 2023 (TATOLI)- Asosiasaun Futebol munisípiu Viqueque serbisu hamutuk ho Federasaun Futebol Timor-Leste (FFTL) fó kapasitasaun arbitrajen ba pesoál arbitrajen hamutuk na’in-50 hodi prepara rekursu arbritrajen kualidade iha mundu futeból.
Prezidente Asosiasaun Futeból munisípiu Viqueque, Cosme Sarmento, hateten, kapasitasaun ba arbitru sira ho objetivu kria kondisaun ba área desportiva sira, lidera jogu iha munisípiu Viqueque.
“Kapasitasaun ami kria ba ita-nia arbitrajen sira hodi sira bele iha koñesementu futeból nian atu nune’e jogu ruma iha munisípiu Viqueque sira lidera. Tanba mundu glibalizasaun sempre iha mudansa iha área mundu futeból entaun ita tenke fó kapasita beibeik atu sira bele kumprende kona-ba regra jogu sira”, Prezidente AFV, Cosme Sarmento, hateten ba jornalista sira, iha salaun Sentru Juventude Viqueque, sádadu ne’e.
Cosme hatutan, kapasitasaun ba arbitrajen importante tanba atividade futeból ne’ebé realiza iha munisípiu Viqueque dala barak mosu bei-beik komflitu sira; mosu dala ruma relasaun ho arbitrajen sira.
“Atu oinsa redús kumflitu sira-ne’ebé mosu futeból, ita presiza kapasita arbitrajen sira nune’e sira lidera bola labele halo sala. Ha’u espera katak liuhusi formasaun ne’e bele hasa’e arbitrajen sira-nia koñesementu no abilidade iha mundu futeból”, nia hato’o.
Nia dehan, antes ne’e arbitru hamutuk na’in-100 maka hetan ona formasaun husi FFTL, maibé barak maka sai envolve fali klube sira iha Viqueque no balu lakohi sai arbitru.
Iha fatin hanesan, Diretór arbitrajen husi FFTL, Nivio da Costa Fernandes, haktuir formasaun arbitrajen ne’e programa anuál hodi FFTL hodi kria formasaun ba arbitru sira husi asosiasaun 14 iha munisípiu sira hodi hasa’e koñesementu arbitrajen sira nian.
“Iha formasaun ne’e, ami fó tékniku, regulamentu, fitness no prátika iha kampu. Formasaun ne’e ami fó arbitrajén futeból no futsal tanba ami hakarak hetan arbitrajen ida ne’ebé di’ak hodi hetan selesaun hodi ba lidera jogu iha nível nasionál no internasionál “, nia sublña.
Nia husu arbitru sira tenke partisipa másimu iha formasaun hodi finaliza formasaun bele komprende la la’ok arbitrajen nian.
Iha biban ne’e adiministradór munípiu Viqueque, Januario Soares “Bolly”, enkoraja pesoál arbitrajen sira hodi aprende nune’e bele lidera jogu labele hamosu problema iha kampu-laran tanba jogu la’o di’ak presiza arbitrajen ne’ebé di’ak.
“Nune’e iha oportunidade ida-ne’e ha’u hakarak husu ba arbitrajen sira hotu aproveita didi’ak formasaun ne’ebé FFTL oferese tanba ita mós hakarak iha arbitrajen ne’ebé kualidade no transparánsia iha envtu desportu sira iha futuru”, nia realsa.
Iha formasaun ne’e abertura husi administrafór munisípiu Viqueque, hetan partisipasaun husi komadante Polísia Munisípiu Viqueque, komadante PNTL eskuadra postu Viqueque Vila, administradór postu Viqueque Vila, membru asosiasaun futébol munisípiu Viqueque.
Formadór hamutuk na’in haat husi FFTL kompostu husi formadór futeból na’in rua no futsal na’in rua. Formasaun ne’e hala’o durante loron lima hahú sábadu sei ramata kuarta no formasaun ne’e pesoál arbitrajen hamutuk na’in-50 ne’ebé mai husi postu administrativu lima, hanesan Ossu, Lacluta, Watu Carbau, Uato-Lari no Viqueque.
Jornalista:Vitorino Lopes da Costa
Editóra : Rafael Ximenes de A. Belo
