DILI, 12 agustu 2023 (TATOLI)- Primeiru-Ministru, Kay Rala Xanana Gusmão, halo observasaun ba Sentru Nasionál Reabilitasaun, Institutu Públiku (CNR, I.P), hodi haree direta kondisaun sentru ne’e nian.
Xanana Gusmão defende katak, presiza kria fatin espesífiku ida hodi fó tratamentu espesiál ba vítima violasaun seksuál sira ne’ebé durante ne’e hetan violasaun hosi aman rasik, no ema seluk.
“Ministra Solidariedade Sosiál, Sekretáriu Estadu, no diretór sira sei haree didi’ak tanba presiza tebtebes atu kria fatin espesífiku ida, ema hela iha sentru ne’e barak tebes, dala ruma ita dehan ema laiha más derrepente de’it ema mai barak tiha, ne’ebé presiza tebes fatin ida para labarik feto kiik-koan sira ne’ebé hetan violasaun seksuál, sira ne’e presiza fatin di’ak ida ka fatin espesiál ba sira”, Xefe Governu hateten hafoin haree direta kondisaun CNR, iha Becora, sábadu ne’e.
Xanana hatutan, Sentru Nasionál Reabilitasaun ninia espasu la to’o ona hodi akumula pasiente sira tanba sira mai hosi fatin hothotu. Pasiente sira ne’e tantu labarik to’o katuas no ferik, ne’ebé hetan moras stroke, tanba ne’e mak fatin lato’o.
“Maibé iha pasiente ne’ebé ita temi karik espesiál ne’ebé mosu dadauk, labarik feto tinan hitu to’o tinan sia ne’ebé hetan violasaun seksuál hosi aman, no ema seluk, ida-ne’e tenke iha kuidadu espesiál tebtebes ba sira tanba iha sentru ne’e públiku liu ne’ebé labele, tenke iha fatin ida ne’ebé ita temi karik privadu oitoan para asisténsia ne’e la’ós ba nia moras más asisténsia ne’e ba nia psikolojia, mentalidade, espíritu hodi nia senti katak futuru iha nafatin nia liman”, Xanana tenik.
Biban hanesan, Ministra Solidariedade Sosiál no Inkluzasaun, Verónica da Dores rekoñese katak presiza duni kria kondisaun ida di’ak tanba ne’e sei hamutuk ho SEFOPE hodi buka solusaun.
“Primeiru-Ministru haree hela situasaun saida mak akontese iha Sentru Nasionál Reabilitasaun, ne’ebé ami na’in-rua Sekretáriu Estadu sei tuur hamutuk hodi buka solusaun ba preokupasaun ne’e liliu ba vítima sira ne’ebé presiza tulun espesífiku”, nia salienta.
Kona-ba harii fatin espesífiku, Ministra lakohi atu ko’alia tanba segredu.
Xefe Ezekutivu observa CNR akompaña hosi Ministra Solidariedade Sosiál nó Inkluzaun, Verónica das Dores, no Sekretáriu Estadu Formasaun, Profesionál no Empregu, Rogério Araújo Mendonça, no Sekretáriu Estadu Komunikasaun Sosiál, Expedito Dias Ximenes.
Jornalista : Antónia Gusmão
Editór: Rafael Ximenes de A. Belo
