Governu Korea-Nova Zelándia prontu fó bolsa estudu ba funsionáriu ME
DILI, 13 agostu 2023 (TATOLI)–Governu Korea no Governu Nova Zelándia ne’ebé sai parseiru di’ak ho Governu Timor-Leste promete prontu apoiu bolsa estudu ba funsionáriu Ministériu Edukasaun iha tinan oin atu ba kontinua estudu iha nivel diploma no mós pós graduasaun ba mestradu.
Ministra Edukasaun, Dulce de Jesus Soares, hateten Governu Korea no Governu Nova Zelándia liuhosi sira-nia embaixada iha Timor-Leste promete ona prontu apoiu bolsa estudu ba funsionáriu iha Ministériu Edukasaun atu ba kontinua sira-nia estudu iha nasaun refere iha 2024, tanba sira hakarak dezenvolve edukasaun iha ho kualidade liután iha Timor-Leste.
“Ha’u kontente tanba ita hetan ona promesa ida kapaas tebes kona-ba program bolsa estudu ba funsionáriu Ministériu Edukasaun nian atu ba kontinua estudu iha rai-li’ur. Ha’u dehan ida-ne’e oportunidade, tanba ne’e funsionáriu sira tenke aproveita ho didi’ak,” Governante ne’e hateten iha salaun Ian Martin INFORDEPE Balide fain lalais ne’e.
Sé maka iha interrese, nia dehan, bele aproveita oportunidade ne’e hodi ba kontinua ninia estudu tanba duadór sira-nia disponibilidade ne’e nu’udar asaun ida atu tulun Governu TL hodi dezenvolve di’ak liután Ministériu Edukasaun ba futuru.
Nia hateten, labele hakuak de’it pozisaun ho nivel akadémiku ida-ne’ebé seidauk másimu kontente ona hodi lakohi hadi’a nivél edukasaun iha future, tanba oportunidade ne’ebé iha tenke foti hodi nune’e bele lori edukasaun ba oin.
Oportunidade ida-ne’e sei loke odamatan ba funsionáriu sira hodi prepara an atu sai dirijente ho kualidade iha futuru, tanba ne’e labele kontente ho buat ne’ebé mak funsionáriu sira hetan agora, buat sira-ne’e seidauk to’o no la garante dezenvolvimentu ba futuru.
Maibé, tuir nia, ho mehi ne’ebé nasaun duadór sira hakarak apoiu ne’e mak oportunidade di’ak ne’ebé tenke aproveita kedan, hodi nune’e bele kapasita ida-idak nia-aan atu bele hala’o servisu iha ME ho di’ak liután.
Ministra ne’e esplika, bolsa estudu ne’ebé oferese ba funsionáriu ME ne’e ho durasaun tempu entre fulan-neen ba diploma no mós pos gradusaun ba mestradu.
Programa ida-ne’e maske sei iha prosesu diskusaun nia laran maibé posibilidade sei akontese iha tinan oin 2024.
Ministériu Edukasaun hahú agora halo hela ezersísiu atu buka identifika ho di’ak no loloos nesesidade diresaun sira-nian, atu nune’e bainhira programa ne’e hetan ona konkordánsia mak dirasaun bele submete ona lista funsionáriu sira-ne’ebé hetan oportunidade ne’e ba Ministériu hodi kontinua sira nia estudu.
Jornalista : Tomé Amado
Editór : Cancio Ximenes
