Graduasaun membru PSHT 793 iha Covalima la’o ho dame
COVALIMA, 13 agostu 2023 (TATOLI)–Komandante PNTL munisípiu Covalima, Superintendente Calisto Gonzaga, hateten serimónia graduasaun membru Persaudaraan Setia Hati Terate (PSHT) foun ne’ebé hala’o iha munisípiu Covalima la’o ho amizade no dame.
Membru PSHT ne’ebé simu graduasaun iha Covalima ne’e hamutuk 793 ne’ebé kompostu hosi mane 477 no feto hamutuk 316, no hosi númeru hirak ne’e mai hosi postu administrativu Suai iha ema 375 kompostu hosi mane 220 no feto 155, postu Maucatar hamutuk 196 kompsotu hosi mane 121 no feto 75, postu Zumalai hamutuk 169 kompostu josi mane 99 no feto 70, no postu Tiloma hamutuk 47 ne’ebé kompostu hosi mane 31 no feto hamutuk 16.
“Ita apresia no hato’o parabéns ba sira-ne’ebé hetan sira-nia membru foun, membru lori hela naroman no buat foun ba sira-nia família no sosiedade ida-ne’e mak ita hakarak iha serimónia graduasaun hosi membru PSHT iha Covalima la’o ho amizade, nune’e la’o ho di’ak,” Superintendente Calisto Gonzaga hato’o ba jornalista sira bainhira partisipa serimónia graduasaun membru PSHT foun, iha Covalima.
Komandu PNTL mós fó hanoin ba membru PSHT foun ne’ebé foin hala’o graduasaun iha regra jerál hosi artemarsiál hosi PSHT, tenke hatudu ho umilidade, simu malu, tanba ema matenek maibé fuan la boot, ema fuan boot maibé laiha amizade
Organizasaun hamutuk hotu matenek iha fuan boot simu no kura ema hotu, nune’e la hamosu konflitu entra arte marsiál no lori sira no hanorin sira ho dalan di’ak.
Serimónia graduasaun ne’e la’ós hosi Komandu Polísia Nasionál Timor-Leste munisípiu Covalima de’it mak fó sergurasan hodi asegura serimónia graduasaun, maibé PNTL hamutuk organizasaun arte marsiál no arte rituál sira hamutuk ho asegura serimónia graduasaun.
Entretantu, antes atu hala’o serimónia graduasaun ba membru PSHT foun hahú iha loron 08-10 fulan-agustu tinan 2023 hala’o teste jago ba kandidatu membru PSHT hafoin kontinua hala’o serimónia graduasaun.
Kandidatu membru PSHT ne’ebé hahú teste jago ne’ebé hala’o, iha postu Administrativu Zumalai, Bairru Haree Kain, postu Suai, suku Beco Maucola no suku Debos, aldeia Tabakolot, postu Maucatar iha aldeia Dais no postu Tilomar iha Koitau.
Nia hateten, antes atu hala’o serimónia halo preparasaun kulminante iha loron hirak liu ba hamutuk ho organizasaun artemarsiál, arte rituál, federasaun no sub-KRAM Covalima ho joventude iha kompromisu garante no fó asisténsia másimu ba membru PSHT hala’o serimónia graduasaun.
Membru arte marsiál seluk fó seguransa ba serimónia graduasaun
Aleind ene’e, Administradór Munisípiu Covalima, Francisco de Andrade, akompañadu hosi sekretáriu hamutuk ho komandante PNTL Covalima no prezidente sub-KRAM partisipa seirmónia graduasaun dahuluk ba membru Persaudaraan Setia Hati Terrate foun ne’ebé realiza iha munisípiu Covalima.
“Ami partisipa serimónia graduasaun hosi ita-nia alin Persaudaraan Setia Hati Terata (PSHT) foun sira hala’o serimónia graduasaun dahuluk ne’ebé hala’o iha munisípiu Covalima, hanesan autoridade Covalima enkoraja joven sira, nune’e serimónia graduasaun la’o di’ak,” Autoridade Covalima, Francisco de Andrade, hateten ba jornalista-sira.
Prezidente Sub-KRAM Covalima, Francisco Barros, hateten bazeia baze legál, segundu diretiva dekretu-lei númeru 5/2017 orienta ba KRAM atu kolobora hodi kria amizade entre arte marsiál iha fatin ne’ebé de’it.
“segundu diretiva dekretu-lei númeru 5/2015 orienta mai ami sub-KRAM kolabora ho parte hotu hodi kria amizade entre arte marsiál hotu, tanba komandante munisípiu administradór hamutuk ho ami sub-KRAM ami estabelese hodi konvida arte marsiál sira seluk asesgura serimónia graduasaun,” nia hateten.
Sekretáriu IKS-PTL filiál Covalima, Ruben do Rego Alves, sente orgullu tanba membru PSHT foun ne’ebé hala’o serimónia graduasaun dahuluk iha munisípiu Covalima, hanesan faze dahuluk hodi transforma hanoin atu kria unidade.
“Ami orgullu ho atividade ho parte KRAM hamutuk ami-nia maun-alin PSHT realiza serimónia graduasaun hanesan faze inisíu bele transforma bele loke ona hanoin, durante ita nunka hanoin oinsá atu kria unidade,” nia dehan.
Iha serimónia graduasaun ne’e, nia dehan, dala barak liafuan unidade mai de’it ho liafuan ho laiha asaun konkreta, ho serimónia graduasaun bele muda pensamentu no mentalidade nune’e lori organizasaun hotu nia naran votu parabéns ba maun-alin PSHT hetan ona graduasaun.
“Ami-nia mensajen nafatin ita kuda unidade ba malu ita hotu hamutuk hodi kontribui ba Estadu direitu demokrátiku Estadu iha hamriik ba mai ho istória no kontribuisaun luta pertense ba ema hotu nia kontribuisaun, oinsá kria pós hodi kontribui ba dezenvolviementu iha rai ida-ne’e,” nia hateten.
Jornalista : Celestina Teles
Editór : Cancio Ximenes
