Covalima ezekuta ona orsamentu programa merenda eskolár $358.668.24
COVALIMA, 14 agostu 2023 (TATOLI)–Xefe Departamentu Jestaun Programa Merenda Eskolár, Gregório Ferreira Afonso, hateten hahú fulan-abríl to’o fulan-juñu tinan 2023, ezekusaun orsamentu ba implementasaun programa merenda eskolár iha Covalima atinje ona $358.668.24 (31,35%) hosi totál orsamentu $1,143,937.24.
Notísia Relevante: Edukasaun Covalima lansa merenda eskolár iha EBC Ladi
“Governu aloka orsamentu atu implementa programa merenda eskolár ba munisípiu Covalima ba tinan fiskál 2023 hamutuk $1,143,937.24, ne’ebé foin ezekuta $358.668.24 ho nune’e saldo $785.268,96 maibé ezekusaun orsamentu fulan agostu prosesu hela,” Gregório Ferreira Afonso informa ba Agência Tatoli, iha nia servisu fatin, Santa Rosa, segunda ne’e.
Covalima foin mak ezekuta $ 358.668.24, implementa programa merenda eskolár, tanba iha Covalima hahú implementa programa ne’e iha trimestre daruak, nune’e orsamentu ba trimestre dahuluk ne’e fila-fali ba kofre Etadu tanba la konsege ezekuta.
Orsamentu ba programa merenda eskolár ezekuta hosi Ekipa Jestaun Programa (EJP) ne’ebé Servisu Edukasaun Munisípiu Covalima estabelese ona Ekipa Jestaun programa hamutuk 23.
Estudante ne’ebé sai benefisiáriu ba programa merenda eskolár iha munisípiu Covalima ne’e hamutuk 17,431 ne’ebé fahe ba estudante ensinu báziku 15,809 no estudante pre-eskolár hamutuk 1,622.
Jornalista : Celestina Teles
Editór : Cancio Ximenes
