COVALIMA, 14 agostu 2023 (TATOLI)–Servisu Edukasaun Covalima liuhosi Xefe Departamentu Parke Eskolár, Manuel França, hateten Servisu Edukasaun Covalima simu ona lista estudante finalista na’in-2,786 ne’ebé atu partisipa ezame nasionál, fulan-outubru periódu 2023.
“Ami rekolla hela dadus hamutuk ho diretór eskola ho Dirasaun Nasionál Kuríkulu hodi halo verifikasaun dadus estudante finalista ne’ebé atu partisipa ezame nasionál períodu 2023 hamutuk 2.786” Xefe Departamentu Parke Eskolár, Manuel França, hateten ba Agência Tatoli, iha nia servisu fatin, Santa Rosa, segunda ne’e.
Estudante finalista hamutuk 2.786 mak atu partisipa ezame nasionál mai hosi eskola 33 ne’ebé kompostu eskola ensinu báziku 24 ho nia estudante finalista hamutuk 1,577, eskola ensinu sekundária jerál tolu (3) ho totál estudante 896, eskola sekundáriu tékniku vokasionál neen (6) ho totál estudante finalista 313.
Aleinde Servisu Edukasaun Covalima, diretór eskola sira hamutuk Dirasaun Nasionál Kuríkulu verifika dadus estudante, maibé Dirasaun Nasionál kurikulum fahe informasaun ba diretór sira kona-ba preparasaun ba ezame nasionál.
Dirasaun Nasionál Kuríkulu fahe informasaun prepasaun ezasme nasionál, kona-ba dadus estudante finalista, kritéria ezame hanesan ba profesór vijilánsia bainhira estudante-sira ezame ne’e profesór vijilánsia labele sai-tama, labele fuma sigarru, estudante labele halo barullu no mós ba jornalista sira bainhira atu foti imajen labele tama ba sala-de-aula maibé hasai imajen hosi dook.
Ezame nasionál ba periódu tinan 2023 ne’e, iha mudansa ba kurríkulu tanba antes estudante finalista hala’o ezame nasional matéria neen (6), maibé agora aumenta máteria ida (1) nune’e matéria hamutuk hitu (7) tanba aumenta ho dixiplina lian tetun.
Tuir Kalendáriu hosi Ministériu Edukasaun Juventude no Desportu (MEJD) Ezame Nasionál sei hala’o iha fulan-outubru tinan 2023, nune’e diretór eskola, Dirasaun Nasionál Kurríkulu hamutuk ho Servisu Edukasaun Covalima halo verifikasaun dadus ba estudante finalista sira.
Jornalista : Celestina Teles
Editór : Cancio Ximenes
