Governu hala’o pagamentu ba benefisiáriu bolsa méritu fazeadamente
COVALIMA, 14 agostu 2023 (TATOLI)–Governu liuhosi Ministériu Edukasaun Juventude no Desportu (MEJD) hahú hala’o ona pagamentu ba benefisiáriu bolsa méritu iha munisípiu Covalima maibé pagamentu ho faeadamente.
“Fazeadamente katak benefisáriu sira-ne’ebé nia osan seidauk tama iha konta bankária banku nian, tenke ho pasénsia hodi hein,” Xefe Departamentu Parke Eskolár, Manuel França, hateten ba Agência Tatoli iha nia servisu fatin, Santa Rosa, segunda ne’e.
Ho nune’e, benefisiáriu sira-ne’ebé asesu bolsa méritu nia naran la hanesan ho lista bolsa méritu tanba estudante hosi primeiru siklu atu eskola laiha sertidaun batizmu, bainhira nia oan sai mellor klasifikadu presiza nia kritéria
Kritéria hirak ne’ e mak sertidaun batizmu atu trata Sertidaun RDTL no mós bainhira atu trata konta bankária presiza Sertidaun RDTL no Billete Identidade (BI) ho ida-ne’e hamosu benefisiáriu sira-nia naran la hanesan.
Tuir dadu hosi Servisu edukasaun Covalima, benefisiáriu na’in-11 nia naran la hanesan bazeia ba dadus ne’ebé edukasaun Covalima submete ba nasionál, maibé edukasaun Covalima sei fasilita benefisiáriu hodi halo justifikasaun atu halo karta akompañamentu.
Maske Governu hahú halo ona pagamentu maibé ba benefisiáriu ne’ebé seidauk kompleta sira-nia dokumentu, ministériu sei buka meiu oinsá ba benefisiáriu hanesan benefisiáriu nia inan-aman divorsiu laiha sertidaun, inan-aman mate laiha sertidaun óbitu, servisu edukasaun sei buka solusaun hodi halo kooperasaun ho Banku.
Benefisiáriu ne’ebé atu asesu ba bolsa méritu na’in-985 ne’ e hosi eskola 211 ne’ebé estabelese iha Covalima ho totál orsamentu hamutuk $548,150.00.
Estudante ne’ebé sai benefisiáriu ba bolsa méritu hanesan estudante primeiru siklu ensinu báziku hosi 4 ano ba 5 ano ho totál benefisiáriu 435 ho totál eskola 87, ho nia orsamentu $217,500.00.
Benefisiáriu 2 siklu ensinu báziku hosi 6 ano ba 7 ano ho totál estudante 400 hosi eskola 80, ho nia orsamentu hamutuk $200.000.00.
Nivél eskola 3 siklu 9 ano benefisiáriu 78 hosi eskola 26 ho nia orsamentu hamutuk $58,500.00
Estudante nivél eskolár 12 ensinu sekundáriu jerál ho totál benefisiáriu 12 hosi eskola haat (4), ho nia orsamentu $9, 000.00.
Nivél eskolár 12 ensinu tekniku vokasionál benefisiariu hamutuk 15 ne’e hosi eskola lima (5), ho nia totál orsamentu hamutuk $11,250.00.
Nivél eskola ezame pasajen klase hosi 11 ano ba 12 ano ensinu sekundáriu jerál ho benefisiáriu hamutuk 20 hosi eskola haat (4), ho nia totál orsamentu $10.000.00.
Nivél eskola ezame pasajen hosi 11 ano ba 12 ano ensinu tékniku vokasionál benefisiáriu 25 hosi eskola lima (5) ho nia total orsamentu hamutuk $12,500.00 no bolsu méritu nivél munisípiu ba EB no ESG orsamentu hamutuk $29,400.00
Jornalista : Celestina Teles
Editór : Cancio Ximenes
