Governu presiza haree estasaun kombustível iha Dili atu prevene inséndiu

DILI, 14 agostu 2023 (TATOLI)—Deputadu bankada FRETILIN iha Parlamentu Nasionál (PN), David Dias Ximenes ‘Mandati’, husu Governu presiza haree estasaun kombustível agora nakonu no estabelese iha kapitál Dili hodi prevene inséndiu.

“Hau foti beibeik ona, problema estasaun kombustível makaas tebes, ita hein labele akontese buat ruma maibé akontese ita halai hotu la biban. Ha’u-nia hanoin, Governu agora oinsá la’ós atu hasai ba fatin sira seluk izoladu para ita-nia karreta sira liu ba ense kombustível. Tanba, iha tinan hirak liubá, iha estasaun kombustível ida bainhira iha kalan atu mosu inséndiu, nune’e indivídu ida hamate mezmu nune’e nia tenke lakon vida,” Mandati levanta liuhosi reuniaun plenária PN, segunda ne’e.

Vise Ministru ba asuntu Parlamentár, Adérito Hugo da Costa, rejista hela preokupasaun ne’e no sei hato’o ba parte Autoridade Nasionál Petróleu no Minerál (ANPM).

“Dili nakonu ho estasaun kombustível, ami rejista ida-ne’e ba autoridade ANPM nian atu haree kestaun ida-ne’e. Tanba, realidade postu kombustível barak tebe-tebes iha kapitál Dili,” nia hateten.

Jornalista : Nelson de Sousa

Editór       : Cancio Ximenes