MAE fó tempu fulan haat ba responsável projetu aselera konstrusaun
DILI, 14 agostu 2023 (TATOLI)—Governu liuhosi Ministru Administrasaun Estatál (MAE) bolu atensaun ba administradór munisípiu Ainaro, Dili, no Manatuto hodi aselera projetu sira-ne’ebé hahú iha 2016 atu finaliza iha fulan haat nia-laran, hahú hosi agostu to’o dezembru 2023.
“Projetu sira-ne’ebé mak hahú iha 2016 mai to’o agora ne’e seidauk finaliza sei labele to’o iha tinan 2024. Governu fó tan de’it tempu to’o fulan dezembru tinan ne’e. Hanesan ami Manatuto nian, monumentu ho jardin ne’e seidauk hotu maibé orsida fila ha’u sei ko’alia ho responsável ba projetu ne’e hodi aselera, nune’e bele finaliza iha dezembru tinan ne’e. Maibé kuandu la hotu iha tinan ne’e mak projetu ninia orsamentu tenke fila ba kofre Estadu ona,” Sekretáriu Administradór Munisípiu Manatuto, Eduardo Guterres, hateten ba Agência Tatoli iha edifísiu Ministériu Adminiztrasaun Estatál (MAE), Colmera, segunda ne’e.
Projetu sira-ne’e, nia hateten, hahú iha tinan 2016 no seidauk finaliza tanba de’it pandemia COVID-19, nune’e mak Ministru bolu administradór hosi munisípiu tolu ne’e hodi aselera iha fulan haat nia-laran.
Husu kona-ba nia progresu, nai dehan, ba monumentu nian kuaze hotu ona tanba hela de’it mak Bandeira nia naran, eroi sira-nia naran, no mós padre nia naran, plaka hodi ema-nia naran mak seidauk.
“Maibé eintermu estatua, Jardin ne’e hotu ona. Ita só falta de’it mak espasu iha portaun oin ne’ebé tau ema-nia naran mak seidauk. Aliende ida-ne’e, hanesan postu saúde tolu iha Fatumakerek, Funar no ida seluk iha Aimeta laran, sira mós seidauk tanba dezastre naturál hodi estraga dalan no ema labele ba finaliza ninia konstrusaun hanesan balun falta de’it haris fatin, maibé iha balun hotu hein atu entrega de’it,” nia dehan.
Konstrusaun postu saúde Fatumakerek ho osan $48.000, postu saúde Funar nian hamutu $90.000 no postu saúde iha Aimetalaran mak $42.000.
Orsamentu ba monumentu hodi tau nia asesoria inklui ho hadi’a jardin ne’e hamutuk $21.000, no kompañia ne’ebé toma responsabilidade mós ministru bolu ona no haruka nia tenke aselera projetu ne’e.
Ministru Adminiztrasaun Estatál (MAE), Tomas Cabral, hateten nia parte bolu administradór tolu ne’e hodi aselera nia konstrusuan, tanba projetu Ajénsia Dezenvolvimentu Nasionál (ADN) fó fila mai hosi 2016 nian.
“Ha’u bolu sira tanba projetu ADN fó fila mai hosi 2016, projetu balun hotu ona maibé pagamentu la halo. Hanesan iha Fatukmakerek, Laclubar nian ne’e uma hotu kuaze tinan hitu ka ualu ona, ema labele fó xave atu tama tanba la selu,” nia dehan.
Projetu kuaze 10-resin, ADN fó fila fali inklui munisípiu Dili hanesan sede suku Madohi, sede ne’e uza tan tiha ona maibé seidauk selu, agora atu halo rehabilitasaun ba projetu ne’e ema lakohi ona tanba selu retensaun $6.000 no sé mak halo rehabilitasaun ne’e.
“Tanba ne’e, ohin, bolu administradór munisípiu Dili, Ainaro no Manatuto mai. Projetu ne’ebé seidauk selu halo favór ba halo identifikasaun,” nia hateten.
Nia hateten, obrigasaun hotu-hotu la tau prioridade ba ne’e tanba ida-ne’e administradór nia papel, tanba sira mak servi iha ne’ebá la’ós ba sosa fali karreta.
“Tanba ne’e mak Administradór sira tenke tun ba haree projetu sira iha munisípiu, agora projetu ne’ebé finaliza no até balun uza tan tiha ona maibé seidauk selu. Ida-ne’e signifika administradór la tun ba haree projetu iha munisípiu sira,” nia dehan.
Ho ne’e, nia konvoka reuniaun ida ho reprezentante Prezidente Autoridade Munisipiu Dili, Administrador Munisípiu Manatutu ho Munisípiu Ainaro, ho objetivu atu ko’alia kona-ba projetu sira-ne’ebé mak hala’o hela iha munisípiu tolu ne’e, relasiona ho konfirmasaun hosi parte ADN nian tanba projetu balun finaliza ona maibé seidauk bele utiliza, inklui projetu balun prosesu kontrusaun seidauk termina.
Tanba ne’e, nia orienta atu Prezidente Autoridade ho Administradór sira presiza halo indentifikasaun no halo relatóriu ba projetu kuaze 10-resin ne’e, nune’e halo pagamentu tanba osan iha hela.
Nune’e mós, nia orienta atu haree orsamentu tinan 2024 nian ne’e tenke hatama hotu ba planu kona-ba problema inundasaun, dezastre naturál, irrigasaun no seluk tan, nune’e bele hadi’a no povu bele asesu ba estrada di’ak inklui utiliza irrigasaun ba halai natar nian.
Jornalista : Osória Marques
Editór : Cancio Ximenes
