PN hili membru na’in-lima ba Konsellu Estadu

DILI, 14 agostu 2023 (TATOLI)—Parlamentu Nasionál (PN), segunda ne’e, liuhosi reuniaun plenária hili ona ninia reprezentante membru na’in-lima ba Konsellu Estadu (KS).
“Rezultadu votasaun a-favór 60, votu branku haat, ita iha korum Deputadu 64, hodi nune’e lista ne’ebé ita vota ho maiória absoluta,” Prezidente Parlamentu Nasionál, Maria Fernanda Lay, fó sai iha sala plenária PN.
Tuir karta aprezentasaun lista naran kandidatura membru Konsellu Estadu, haktuir karta bankada CNRT no FRETILIN ba iha Prezidente Parlamentu Nasionál tuir lei haruka mak hanesan Virgílio Smith Krani, Jacinto Viegas Vicente Roque, Nando S. Martins Buras, Ricardo da Costa Ribeiro, Josefa Alves Soares
Tuir konstituisaun artigu 90 (Konsellu-Estadu), iha númeru 1 hateten Konsellu Estadu mak órgaun konsulta polítiku Prezidente Repúblika, ne’ebé nia rasik prezide.
- Halo parte Konsellu Estadu mak:
a.) Eis-Prezidente Repúblika sira-ne’ebé la’ós destituídu;
b.) Prezidente Parlamentu Nasionál nian;
c.) Primeiru-Ministru;
d.) Sidadaun lima ne’ebé Parlamentu Nasionál hili ho armónia tuir prinsípiu
reprezentasaun proporsionál, ba períodu tuir durasaun lejizlatura nian, ne’ebé la’ós
membru hosi órgaun soberania nian;
e.) Sidadaun lima ne’ebé Prezidente Repúblika mak foti, ne’ebé la’ós membru hosi
órgaun soberania nian, ba períodu ne’ebé hanesan ho durasaun tempu ukun Prezidente Repúblika nian.
No, iha konstituisaun aritgu 91 (Kompeténsia, organizasaun no funsionamentu Konsellu-Estadu nian).
- Konsellu Estadu mak bele:
a.) Fó sai kona-ba disolusaun Parlamentu Nasionál;
b.) Fó-sai kona-ba demisaun Governu nian;
c.) Fó-sai kona-ba deklarasaun funu no oinsá atu hala’o dame;
d.) Fó-sai kona-ba kazu seluk tan ne’ebé iha lei-inan no, iha jerál, hato’o konsellu ba
Prezidente Repúblika bainhira nia hala’o ninia kna’ar, no wainhira nia husu karik.
e.) Halo ninia rejimentu internu;
- Reuniaun Konsellu Estadu nian la’ós públiku.
- Lei mak define Konsellu Estadu nia organizasaun no funsionamentu.
Jornalista : Nelson de Sousa
Editór : Cancio Ximenes

