DILI, 15 agostu 2023 (TATOLI)—Autoridade Nasionál Eletrisidade, Institutu Públiku (ANE, I.P) no Autoridade Nasionál Agua no Saneamentu, Institutu Públiku (ANAS, I.P) daudaun ne’e la’ós ona institutu públiku, maibé transforma ona ba diresaun ne’ebé sei tutela iha Ministériu Obra Públika (MOP).
“Atu dehan katak estatutu ANAS no ANE muda hosi institutu públiku ba diresaun jerál ka diresaun nasionál ida iha MOP,” Ministru Obra Públika, Samuel Marçal, informa ba Agência Tatoli, iha ninia knaar fatin, Caicoli, tersa ne’e.
Notísia relevante : Governu nomea membru konsellu administrasaun ANE no ANAS
MOP sei haree didi’ak funsionáriun iha instituisaun Estadu rua ne’e, ein termu prestasaun serbisu.
“Funsionáriu sira sé mak servisu no komportamentu di’ak, hakarak servisu ita kontinua maibé sira ne’ebé baruk ten lakohi servisu fila balá uma,” nia akresenta.
Tuir lista ne’ebé asesu hosi pajina ofisiál Komisaun Funsaun Públika (KFP), fó sai katak funsionáriu ANAS hamutuk na’in-76, kompostu hosi feto 20 mane 56, inklui mós funsiunariu sira iha munisípiu, hosi sira ne’e hotu. Funsionáriu públiku 36 no funsiunariu kontratadu 40. Enkuantu funsionáriu ANE hamutuk na’in-27, kompostu hosi funsionáriu públiku hitu no kontratadu 20.
Governu liuhosi reuniaun Konsellu Ministru Iha, iha loron 27 janeiru 2021, nomea membru konsellu administrasaun ANE, I.P no ANAS, I.P, bazeia ba proposta ne’ebé mak aprezenta hosi Ministru Obra Públika VIII Governu, Salvador Eugênio Soares dos Reis Pires.
Membru hirak ne’e asume knaar ba períodu tinan-haat, hahú hosi tinan 2021. Membru konsellu administrasaun ANE mak Ruben Jerónimo Freitas hanesan Prezidente Konsellu Administrasaun, Jaime Godinho Soares hanesan Vise-Prezidente no Aurora Teresa Carvalho Magno, Junior Raimundo da Cruz no José Maria Xavier hanesan vogál sira.
Enkuantu, membru konsellu administrasaun ANAS mak Domingos Pinto hanesan Prezidente konsellu administrasaun, Francisco Xavier Pereira nu’udár Vise-Prezidente, no Miguel António Ximenes, Dulce Soares no Eugénio Lemos hanesan vogál sira.
Jornalista : Antónia Gusmão
Editora : Julia Chatarina
