KFP sei re-koloka funsionáriu ANAPMA-ANE, I.P-ANAS, I.P ba instituisaun orijen
DILI, 15 agostu 2023 (TATOLI)-Prezidente Komisaun Funsaun Públika (KFP), Faustino Cardoso, hateten sei re-koloka funsionáriu públiku (FP) permanente iha instituisaun sira-ne’ebé halakon hanesan ANAPMA, ANE, I.P no ANAS, I.P ba sira-nia instituisaun orijen no instituisaun seluk.
“Ami atualiza mós oinsá komisaun nia serbisu atu haree ba instituisaun sira-ne’ebé lakon tiha ona iha IX Governu konstituisionál, hanesan Ajénsia Nasionál Planeamentu, Monitorizasaun no Avaliasaun (ANAPMA) ne’ebé uluk tutela ba gabinete Primeiru-Ministru nian, nune’e mós Ajénsia Nasionál Eletrisidade, Iinstitutu Públiku (ANE, I.P) ne’ebé momentu ne’e tutela hosi Ministéiru Obra Públika no Ajénsia Nasionál Água no Saneamentu, Institutu Públiku (ANAS, I.P) ho Sekretáriu Estadu Sosiedade Timorense Exteriór, hodi bele re-koloka fali ba sira nia instituisaun orijen ka instituisaun sira seluk,” Prezidente KFP, Faustino Cardoso, hateten ba jornalista sira hafoin ramata enkontru ho Preizdente Parlamentu Nasionál, Maria Fernanda Lay, iha PN, tersa ne’e.
Instituisaun sira0ne’ebé halakon ona ne’e, oinsá KFP halo komunikasaun ho ministériu tutela liuliu funsionáriu permanente sira-ne’e bele re-koloka fali ba sira-nia instituisaun orijen ka instituisaun sira seluk depende ba polítika no nesesidade atu akomoda.
KFP nia dever hanoin oinsá mak funsionáriu públiku sira permanente haree lalais fó serbisu tanba Estadu selu fula-fulan sira-nia saláriu no ita lakohi sira la halo buat ida abandona.
“Ami hatene númeru funsionáriu permanente iha instituisaun sira-ne’ebé mak lakon ne’e la hanesan balun iha funsionáriu neen, balun 10-resin no balun iha 30-resin,” nia dehan
Prezidente KFP ne’e hateten, liga kona-ba funsionáriu kontratadu, kazuál no sira-ne’ebé regula ho termu sertu ne’e fora hosi kompeténsia Komisaun Funsaun Públika (KFP) nian.
Jornalista : Nelson de Sousa
Editór : Cancio Ximenes
