Moras sanulu rejista aas iha klínika Daitula
BAUCAU, 15 agostu 2023 (TATOLI) – Klínika David Alex ‘Daitula’ rejista moras ho tipu sanulu durante trimestrál daruak tinan-2023 nian.
Koordenadór klínika David Alex ‘Daitula’ Baucau, Leonel da Silva, esplika, moras sanulu ne’e mak hanesan ispa, ipertensaun, artiris, gratritis, rins, diabetes, pulmaun króniku, moras kulit, protata no moras fuan.
“Hosi tipu moras sanulu ne’e pasiente maioria sofre moras tensaun aas,” Koordenadór Klínika David Alex ‘Daitula’ informa ba Agência TATOLI iha Vila Antiga, tersa ne’e.
Hosi tipu moras hirak-ne’e, ipertensaun mak okupa tabela dahuluk hamutuk 502, ispa 480, pulmaun króniku 439, moras kulit 137, gratritis 101, rins 49, diabetes 39, prostata 19 no moras fuan hamutuk pasiente na’in-ualu.
Alende ne’e, Klínika veteranu ne’e rejista mós moras nehan, tiroid, TBC no turbekuloze ne’ebé total hamutuk pasiente 2.931 kompostu veteranu hamutuk 1.820 no komunidade babain hamutuk pasiente 1.111.
“Prosesu atendimentu kontinua la’o ho normál, maske pasiente barak mak halo tratamentu iha klínika ne’e,” Leonel da Silva akresenta.
Klínika Daitula kada loron halo tratamentu ba pasiente hamutuk na’in-50 nune’e difikuldade ne’ebé klínika ne’e hasoru liuliu tempu atu halo vizita ba veteranu sira-ne’ebé moras iha uma atu halo tratamentu tuir misaun.
Klínika Daitula hasoru menus ai-moruk maibé bainhira halo pedidu ba SAMES kontinua prosesa mesmu dalaruma tarde tanba kestaun tempu transportasaun hosi nasionál no menus kuantidade.
Meiu seluk mak direitamente halo proposta ba Konsellu Munisipál Kombantente Libertasaun Nasionál (CMCLN, sigla portugés) atu aloka orsamentu atu kompra hodi fornese ba veteranu sira-ne’ebé presiza atendimentu emerjénsiansia.
Jornalista : Natalino Belo
Editór : Evaristo Soares Martins
