DILI, 15 agostu 2023 (TATOLI)–Prezidente Partidu Demokrátiku (PD), Mariano Assanami Sabino, hateten, partidu seidauk bele realiza promesa eleitorál tanba la manán maioria iha Eleisaun Parlamentár iha loron 21 maiu 2023.
“Kompromisu hotu ne’ebé mak PD halo maibé la konsege manán iha eleisaun, PD iha de’it kadeira neen tanba ne’e ami sei halo esforsu tuir partidu maioria ne’ebé manán eleisaun. PD sei tau ninia ideia nafatin, diskusaun produtivu maibé la’ós tau fali PD nia komprimisu iha fali leten tanba la’ós manán iha eleisaun, se PD manán iha eleisaun maka implementa kedas programa ne’ebé promete,” Prezidente PD hateten iha Palásiu Governu, tersa ne’e.
Notísia relevante : PD promete hasa’e saláriu mínimu ba $200 no fasilita kréditu ba joven sira
Atuál Vise Primeiru-Ministru, Ministru Asuntu Sosiál no Ministru Dezenvolvimentu Rurál no Abitasaun Komunitáriu ne’e dehan, PD tenke kumpre programa partidu ne’ebé manán eleisaun, no agora sai programa ba partidu koligasaun PD ho CNRT, ne’ebé ikus programa ne’e aprova iha Parlamentu Nasionál no sai tiha ba povu tomak tanba Parlamentu aprova unanimidade.
“Entaun agora tempu para membru PD ne’ebe envolve iha Governu implementa programa ne’ebé mak aprova ona. Ba saláriu hakarak ka lakohi saida mak intervensaun ne’ebé maka halo ona maka normaliza fali taxa, maibé tanba presu mundiál entaun presiza kontrolu. Saida mak importante liu ba traballadór sira maka protesaun ba sira, fatin ne’ebé servisu tenke seguru, ida ne’e ha’u sei fó atensaun ba ida-ne’e,” nia kompromete.
Aleinde ne’e, Governu ida-ne’e sei rona nafatin preokupasaun traballadór sira inklui emprezáriu sira hotu ne’ebé fó serbisu no ida ne’ebé mak halo serbisu, nune’e iha balansu.
“Tanba ita tenke rekoñese katak traballadór sira mak halo obra, ohin buat hotu iha ne’e obra mai hosi traballadór sira, tanba ne’e ha’u pesoál, nu’udar Vise Primeiru-Ministru, nu’udar mós líder partidu hakarak dehan dignifika povu hotu,” Assanami tenik.
Iha kampaña eleitorál, PD promete katak bainhira manán iha Eleisaun Parlamentár 2023, sei hasa’e saláriu mínimu hosi $115 ba $250.
Jornalista : Antónia Gusmão
Editora : Julia Chatarina
