DILI, 15 agostu 2023 (TATOLI)–Sekretária Estadu Igualdade (SEI), tersa ne’e, hala’o enkontru ho Grupu Traballu kada Interministeriál ho Intermunisipál sira, oinsá atu identifika opurtunidade no dezafiu sira iha implementasaun planu no programa IX Governu hodi promove igualdade jéneru.
“Ida-ne’e ita halo dahuluk iha ha’u-nia mandatu ho grupu interministeriál no intermunisipál sira, tanba sira iha papél importante hodi asegura polítika, programa no planu ne’ebé mak sensivél ba jéneru. Ita bele dehan, iha implementasaun programa Governu nian iha munisípiu no ministériu sira, atu asegura implementasaun programa no orsamentu sensivél ba jéneru ho nia finalidade atu asegura igualdade jéneru, konta mós ho kontribuisuan hosi grupu traballu interministériál no intermunisipál,” Sekretária Estadu Igualdade (SEI), Elvina de Sousa Carvalho, hateten ba jornalista sira, iha Novo Turismo, Lecidere, tersa ne’e.
Nia hatutan, ho implementsaun programa no orsamentu sensivél jéneru ne’e SEI iha obrigasaun hodi implementa lei sira no adopta polítika ne’ebé bazeia ba konvensaun ne’e.
Konvensaun ne’ebé implementa ne’e halo periodikamente, halo relatóriu ba konvensaun no hosi relatóriu ne’e mak nia rezultadu fó sai ba públiku.
“Hosi rekomendasaun ne’e, ita iha obrigasaun no presiza halo, ita sei la para iha ita-nia atividade sensibilizasaun no transmite interministerial no intermunisipál, maibé ita nafatin halo advókasia,” nia dehan.
Administradór Munisípiu Manufahi, Arantes Isaac Sarmento, hateten nia parte apresia ho enkontru tanba grupu traballu inklui ministériu tantu hosi munisípiu ne’ebé hodi ko’alia kona-ba igualdade jéneru, maibé iha ligasaun mós ho servisu feto sira-nian oinsá atu dezenvolve feto iha área rurál, liuliu iha aspetu ekonómia nian.
“Ha’u hanoin, ida-ne’e importante ba ministériu hotu-hotu tau planu ida ho asaun, la’ós atu ko’alia de’it importante mak iha asaun ida,” nia hateten.
Asuntu ne’e, nia husu atu Governu tau atensaun, tantu nasionál no iha munisípiu sira hotu, nune’e ho rekomendasaun hosi CEDAW nian ne’e kabe ba ministériu hotu nian la’ós ba SEI nian.
“Ida-ne’e mós bele fó servisu ida ba munisípiu sira tanba bazeia ba kompeténsia ne’ebé mak mensiaona ho dekretu-lei Númeru 3/2016. Entaun, hosi ne’e munisípiu mós iha ona planu no programa ba ida-ne’e. Tanba ne’e mak ami hosi Manufahi nia planu mak asuntu servisu sosiál sira no ida tan mak halo diseminasaun kona-ba lei kontra violénsia doméstika, parte saúde nian hanesan kankru no oinsá ita rekapasita ba feto maluk sira, ida-ne’e ba nivel rurál nian. Aleinde ne’e ita mós fó apoiu sosiál bai ta-nia feto sira-ne’ebé sai vítima ba violénsia doméstika nian inkui feto vulnerável tebes,” nia dehan.
Jornalista : Osória Marques
Editór : Cancio Ximenes
