DILI, 15 agostu 2023 (TATOLI)–Sekretária Estadu ba Igualdade (SEI), Elvina de Sousa Carvalho, hateten xefe suku no xefe aldeia atuál iha Manufahi mak sai pioneiru ba feto seluk hodi kompete iha eleisaun xefe suku iha fulan-outubru.
“Xefe suku sira-ne’e sai pioneiru ba feto sira seluk atu banati tuir no ha’u fiar katak ho sira-nia prestasaun servisu ne’ebé di’ak, enkoraja feto seluk hodi kompete iha eleisaun suku ne’e. Garante katak pursentu feto ba xefe suku sei sa’e tanba haree hosi 5% ne’ebé mak sai xefe suku hatudu ona kualidade no lidera ho di’ak no ho domin. Tanba ne’e, presiza apoiu no korajen atu eleisaun mai ne’e bele aumenta tan nia pursentu,” Governante ne’e hateten ba jornalista sira, hafoin enkontru ho Grupu Traballu Jéneru, iha Hotel Novo Turismo, Lecidere, tersa ne’e.
Tanba, nia hateten, SEI mak mákina Estadu no Governu ne’ebé espesifikamente ko’alia kona-ba feto, polítika promove igualdade jéneru, entaun partisipasaun feto iha eleisaun suku ne’e importante.
“Konstituisaun no lei fó dalan agora oinsá mak atu partisipa ativu liután mak feto tenke brani, feto tenke hetan apoiu hosi ema-ne’ebé mak besik liu nia. SEI mós sei akompaña prosesu ne’e tomak, nune’e garante katak sei lahetan diskriminasaun hosi parte balun. Ha’u fiar katak, iha Timor-Leste, feto barak sei kandidata-aan ba xefe suku,” nia dehan.
Administradór munisípiu Manufahi, Arantes Isaac Sarmento, hateten autoridade munisipál ho feto potensiál iha Manufahi hahú identifika feto poténsia hodi kandidata-aan ba eleisaun xefe suku ne’ebé sei akontese iha outubru tinan ne’e.
“Liga ho eleisaun suku nian horisehik ha’u halo enkontru ho feto potensiál sira tantu maihosi polítika, sosiedade sivil inklui hosi instituisuan Estadu sira, hodi prepara no identifika feto poténsai iha kada suku atu kandidata-aan ba eleisaun ne’e. No, Manufahi iha esperansa boot katak suku 29 ne’e feto sei prienxe hotu no mós ba aldeia 37 ne’e,” nia hateten.
Nia dehan, identifikasaun ne’ebé sira halo ne’e hetan apoiu hosi SEI iha Grupu Traballu Jéneru nian, tanba durante enkontru ne’e feto barak entuziasmu hodi partisipa no iha feto na’in-tolu (3) mak prontu ona kandidata-aan ba xefe suku.
“Ida-ne’e ha’u motiva no enkoraja tebes sira atu mínimu suku 28 ne’e feto tenke prienxe agora kestaun manán ka lakon ne’e, la’ós kesataun ba ita. Feto tenke hatudu ona, se feto prontu lidera mak tenke hatudu katak ami feto prontu lidera,” nia dehan.
Iha Manufahi, nia dehan, xefe suku atuál iha ema na’in-rua (2), ida hosi suku Same no ida seluk hosi suku Turiskai no feto ne’ebé kargu nu’udar xefe aldeia ne’e iha ema na’in-lima (5).
Jornalista : Osória Marques
Editór : Cancio Ximenes
