Autoridade Baucau prepara rai ba investidór hosi Burnei Darusalam
BAUCAU, 16 agostu 2023 (TATOLI) – Autoridade Administrasaun Munisipál Baucau sei prepara rai ba investidór hosi nasaun Burnei Darusalam hodi investe iha setór turismu.
Prezidente Autoridade Munisipál (PAM) Baucau, Olivio ‘Bou-lesa’ Freitas, esplika, liuhosi enkontru entre ekipa Autoridade ho embaixadór Timor-Leste ba Burnei Darusalam, Abel Guterres foku liu ba rai ne’ebé identifikadu ona atu halo realokasaun no selu indemnizasaun ba komunidade nune’e bainhira investe labele iha dezintendimentu.
“Embaixadór hamutuk ho osan na’in sira hasoru ona líder sira iha nasionál atu ita sira iha kraik prepara rai, liuliu ko’alia ho komunidade afetadu sira nune’e bainhira investimentu la’o, labele iha problema rai,” Prezidente Autoridade Munisipál Baucau hateten iha Vila Nova, kuarta ne’e.
Bou-Lesa, argumenta, ekipa tékniku sei forma hosi Autoridade Baucau komposta hosi veteranu, autoridade suku, postu no pesoál tékniku sira sei sosializa hodi rona komunidade afetadu atu futuru bele halo indemnizasaun.
Autoridade Baucau seidauk iha kompeténsia relasiona ho seidauk iha podér lokál tanba governu sentrál mak iha kompeténsia másimu atu deside ho planu investimentu refere.
“Agora ita aprezenta planu liuliu kona-ba investimentu ne’e, futuru Baucau atu sai oinsá hanesan iha área Uatabo, tenke prepara no akompaña nune’e bele diskute,” Bou-Lesa akresenta.
Área ne’ebé identifika mak hanesan Kairabela, postu Vemasse, Uatabo suku Buruma, Bahu inklui Caibada Uaimua no Aderai iha Vila Nova purvolta ekatre rihun 10-resin ne’ebé iha poténsia atu investe iha setór turismu, agrikultura, saúde no sentru ba veteranu.
Jornalista : Natalino Belo
Editór : Evaristo Soares Martins
