OÉ-CUSSE, 16 agostu 2023 (TATOLI – Komandante Operasaun Polísia Nasionál Timor-Leste iha Rejiaun Oé-Cusse, Inspetór Xefe Polísia Armando Pauf Lafu Sila, alerta pontu importante rua ba graduante hamutuk na’in-241 hosi Organizasaun Persaudaraan Setia Hati Terrate (PSHT) , hodi kumpri lei no regulamentu sira-ne’ebé estadu prevee no kumpre doutrina organizasaun nian.
Tema ba graduasaun dahuluk hosi organizasaun PSHT iha Oé-Cusse maka, “Transforma mentalidade sosiedade nian ba iha moris fraternidade umana hodi kontribui ba pás”
Armando Pauf, alerta pontu importante rua ne’e, iha ámbitu serimónia graduasaun organizasaun PSHT, iha Portu Iwao Kitahara, Mataha, Oé-Cusse, kinta kalan ne’e.
“Primeiru lori komandu RAEOA nia naran, ha’u orgullu no agradese ba koordenasaun no komunikasaun durante iha hala’o, hahú hosi treina mai to’o ohin graduasaun komunikasaun entre organizasaun arte marsiál, hosi PSHT, IKS no KORK ho komandu PNTL Oé-Cusse kooperasaun di’ak tebes,” Armando Pauf ko’alia iha ámbitu serimónia graduasaun ne’ebé hala’o iha Portu Iwao Kitahara Mataha, Oé-Cusse.
Tuir nia, desde janeiru to’o agostu PNTL seidauk rejista perturbasaun ne’ebé envolve arte marsiál sira iha Oé-Cusse, komando orgullu tebes, nu’udar Atoni Oé-Cusse oan mantein ritmu ne’e, ita hotu akompaña graduasaun iha barak iha munisipíu seluk balu la’o di’ak balu hamosu problema.
“Tan ne’e ha’u lori komandu nia naran, hakarak apela ba graduandu sira hotu liu-liu iha RAEOA ho estrutura tomak, atu tane aas ita-nia estabilidade, koopera malu labele hamosu disturbiu hodi no hamosu violénsia atu halo ita-nia komunidade sira sai pániku no vítima ba ita-nia hahalok, ida-ne’e sei labele akontese iha RAEOA,” nia afirma.
Tuir komandante Operasaun nia observasaun, durante gradusaun ba oraganizasaun sempre iha akontesimentu sira iha munisipíu seluk, maibé ne’e sai hanesan, buka’e ida ba ita atu halo reflesaun, katak Atoni-oan, moris ho kultura, no hakribi violénsia hadomi pas no estabilidade.
Pontu daruak, Komandu PNTL Oé-Cusse rai hela mensajén balu katak, ho seremónia graduasaun organizasaun ba dahuluk iha RAEOA, ita tenki la’o tuir regras no kumpri lei no regulamentu sira, liu-liu doutrina organizasaun PSHT nian.
“Ida-ne’e doutrina ida forte tebes, ba kandidatu graduadu sira tenki obedese no tenki loyál ba regulametu sira tantu Estadu no organizasaun ian, semak halo krime, ne’e responsabilidade pesoál, tenki responsabiliza nia hahalok,” nia fó hanoin.
Nia informa, liga ba lei númeru 5/2017 sei vale to’o daudaun ne’e, liga mós lei sira-ne’ebé tutela ba iha KRAM mai to’o sub-rejiaun sira iha munisipíu sei vale mós, entaun livre ba ema hotu bele hala’o maibé buat hot-hotu kesi ho lei, nune’e persiza hot-hotu nia kontribuisaun.
Lori komandu nia naran, husu feto no mane, no mós estrutura organizasaun PSHT iha RAEOA, labele hamoe ita-nia rejiaun, tanba rejiaun ne’e iha responsabilidade ba hakmatek iha ita-hotu nia liman, la’os autoridade seguransa de’it.
Iha biban ne’e, reprezentante Prezidente Autoridade, Daniél Mauno, atuál Diretór Edukasaun Oé-Cusse, fó hanoin ba graduante sira, atu hatudu ezemplu ne’ebé di’ak iha sosiedade no respeita kultura.
“Alin sira ohin simu graduasaun, para sai membru legál foun ida ba organizasaun ida-ne’e, la’o ba, iha komunidade nia leet, iha ne’ebé maka hatudu ita-nia matenek, hanesan membru organizasaun PSHT, moris hamutuk ho komunidade, persiza fó valór no respeita kultura, no norma sira-ne’ebé di’ak, promove kooperasaun di’ak, ida-ne’e maka ita hein,” Daniel Mauno hateten.
Prezidente Sub-Komisaun Reguladora Arte Marsiál (Sub-KRAM) Oé-Cusse Ambeno, Zeferino da Cruz Salu, rekomenda pontu rua ba graduante sira atu hametin pás-estabilidade hodi kontribui ba prosesu dezenvolvimentu.
“Primeiru, ita-nia disiplina pesoál organizasaun hotu iha mundu inklui Timor-Leste, tenki tau aas dixipliña, segundu ita-nia kontribuisaun, ba ita-nia estabilidade nasionál hodi hametin ita-nia unidade iha oraganizasaun no sosiedade nia leet,” nia katak.
Pontu ne’e mak ita rekomenda, katak integra ba komunidade enkuadra ba desportu, ita hotu mai hosi komunidade mai integra iha organizasaun, ita-nia kontribuisaun ki’ik ida maka liuhosi desportu.
Koordenadór PSHT Oé-Cusse, Candido dos Reis Amaral, informa, graduasaun ba kandidatu warga PSHT ba tinan ne’e hamutuk 241, agradese ba parte hotu nia laran luak, liu-liu ba PNTL Oé-Cusse, Sub-KRAM, no sosiedade tomak nia kontribuisaun to’o ohin bele realiza graduasaun ne’e ho susesu,”
Nia informa, graduante sira-ne’ebé atu simu graduasaun ne’e hamutuk na’in-241 maioria Oé-Cusse oan de’it, ho totál membru permanente organizasaun PSHT atuál iha Oé-Cusse, hamutuk na’in- 300 liu no membru prátikante kandidatu atu sai família permanente organizasaun PSHT hamutuk na’in-500 liu.
Entretantu, durante seremónia graduasaun ne’e, hetan seguransa másima hosi PNTL, no partisipa mós mai hosi hotu organizasaun sira hanesan IKS, KORK, PD, Taek-wondo, karatedo.
Jornalista: Abílio Elo Nini
Editor: Evaristo Soares Martins
