Progresu reabilitasaun sede suku Fohorem atinje ona 75%
COVALIMA, 16 agostu 2023 (TATOLI)–Xefe Suku Fohorem, Fernando Ferreira, hateten progresu Reabilitasaun Sede Suku (RSS) Fohorem ne’ebé implementa hosi Programa Nasionál Dezenvolvimentu Suku (PNDS) iha postu administrativu Fohorem atinje ona 75%.
“Ha’u atu relata kona-ba Reabilitasaun Sede Suku (RSS) Fohorem nia progresu fíziku, implementasaun iha tereñu atinei ona 75%. Razaun reabilitasaun sede Suku Fohorem atinje ona 75%, tanba progresu servisu sede suku taka ona zinku, foru no nahe mós hotu ona, falta de’it monta azuleju, tara odaman ho janela,” Xefe suku Fohorem, Fernando Ferreira, hateten bainhira hala’o diálogu ho Sekretáriu Estadu Dezenvolvimentu Lokál iha salaun AMC. Sukaer Laran, kuarta ne’e.
Antes ne’e, eis Diretór PNDS Covalima, Filipe Cardoso, hateten munisípiu Covalima iha nia suku 30. husi ne’e falta de’it ona sede suku 12 ne’ebé hala’o hela reablitasaun iha postu administrativu Maucatar reabilita sede suku haat, postu Tilomar haat no postu administrativu Fohorem ne’ebé reabilitasaun sede suku atinje ona 75%.
Totál orsamentu reabilitasaun sede suku 12 iha munisípiu Covalima ne’ebé implementa iha postu administrativu Fohorem, Maucatar no Tilomar hamutuk $144,000.00 no hosi orsamentu ne’e kada sede suku $2.000.00.
Jornalista : Celestina Teles
Editór : Cancio Ximenes
