UNICEF vizita armazein SAMES rejionál Baucau
BAUCAU, 16 agostu 2023 (TATOLI) – Parseiru dezenvolvimentu United Nations International Children’s Emergency Fund (UNICEF) kuarta ne’e, halao vizita ba serbisu Autónomu Medikamentu Ekipamentu Saúde (SAMES, I.P) rejionál Baucau.
Diretór Ezekutivu SAMES, I.P, Santana Martins, esplika, objetivu prezensa refere atu observa kona-bá apoia ekipamentu ne’ebé antes ne’e apoia ba SAMES iha situasaun pendemia Covid-19 hodi utiliza ba asegura ai-moruk no ekipamentu iha rejionál Baucau.
“Ami hosi nasionál mai atu justifika ba sira katak apoia hotu ne’ebé parseiru internasionál sira fó la leet de’it, maibé ita iha responsabilidade atu jere ho di’ak ba ekipamentu sira-ne’e,” Diretór ezekutivu SAMES hateten iha Vila Nova, kuarta ne’e.
Iha vizita refere, SAMES,O.P halo esplikasaun ba ekipa UNICEF kona-bá utilizasaun no observa direita ekipamentu sira hanesan cool room, jeleira, transporte, jeradór no solar painel ne’ebé preve orsamentu hamutuk milaun $1.2.
Ekipamentu hirak-ne’e parseiru dezenvolvimentu sira apoia utiliza iha armazein SAMES rejionál Baucau, Ainaro, Bobonaro no Rejiaun Admistrativa Espesiál Oecuse Ambeno (RAEO).
“Hosi armazein tolu ne’ebé iha, vizita ne’e munisípiu Baucau mak reprezenta ona no sei taka iha nasionál loron-18 agostu,” Santana Martins akresenta.
SAMES konsidera apoia refere ajuda ona Timor-Leste hodi kombate Covid-19 liuliu kontinua asegura vasina sira iha programa imunizasaun nune’e presiza preve orsamentu natoon atu halo jestaun liuliu manutesaun ba ekipamentu refere.
Ekipamentu ne’ebé ajuda entrega iha fulan-marsu liuhosi prosesu akizisaun iha tinan-2022 finansia orsamentu hosi governu Japaun no responsável UNICEF inklui halo instalasaun.
Armazein SAMES rejionál Baucau kobre munisípiu haat hanesan Manatuto, Lautém, Viqueque no Baucau inklui Ospitál Rejionál Eduardo Ximenes (HorEX, sigla portugés).
Jornalista : Natalino Belo
Editór : Evaristo Soares Martins
