iklan

BOBONARO, HEADLINE, MUNISÍPIU, SAÚDE

Xefe SSK Bobonaro husu komunidade abitua uza máskara

Xefe SSK Bobonaro husu komunidade abitua uza máskara

Negosiante iha Merkadu Taibesi uza máskara Imajen Tatoli/Antonio Goncalves

BOBONARO, 16 agostu 2023 (TATOLI)-Xefe Sentru Saúde Komunitária (SSK), postu administrativu Bobonaro, munisípiu Bobonaro, Domingos Mesquita da Silva, husu ba komunidade sira atu abitua uza máskara hodi prevene-an hosi moras Infeksaun Respiratóriu Aguda.

Nia apela tanba iha fulan janeiru to’o agostu ne’e reajusta kazu IRA rejista aas liu ho totál ema na’in 1,265 tuir kedas Té-Ben Akut ema na’in 351 no Scabies 291.

Dirijente Sentru Saúde Komunitária ne’e konfirma moras IRA ne’e kauza hosi klima tanba iha tempu bailoro, rai-rahun barak, labarik sira halimar la fase liman, inklui amibiente la mos hodi provoka moras ne’e afeta ba ema-nia isin.

“Ami-nia programa ida NSF ami halo ona promosaun, katak bainhira la’o halimar ba mai tenke ser uza beibeik máskara, atu hadook-aan hosi moras ne’e, karik moras tenke mai konsulta lalais,” nia informa ba Tatoli iha Bobonaro.

Moras Infesaun Vias Respiratória Aguda

Moras infesaun Vias Respiratóriu Aguda (IRA) mak infesaun viral (infeksaun ne’ebé kauza hosi virus) ne’ebé akontese iha ita-nia dalan iis nian. Bainhira ita dada iis anin sei halai tuir ita-nia dalan iis nian antes to’o iha pulmaun. Normalmente ita-nia dalan iis hahú ka forma hosi Inus, Kavidade nasal (inus kuak), faringe no laringe (kanál rua ne’ebé nia lokalizasaun iha kakorok).

Anin sei pasa hosi dalan-isin hirak ne’e molok tama ba traqueia no pulmaun. Infesaun ne’ebé akontese iha ita-nia dalan-iis sei provoka ka halo ita sente susar no la konfortável bainhira dada iis, no nu’udar konsekuénsia sei halo ita-nia isin falta anin hodi hala’o nia funsaun ho di’ak. Moras ida-ne’e fasil tebes da’et no fasil tebes atu kura.

Kauza hosi Infesaun Vias Respiratória Aguda

Moras IRA kauza hosi virus no bateria ne’ebé invade diretamente ita-nia dalan iis liuhosi matan, inus no ibun. Virus sira-ne’ebé hamosu moras ne’e mak hanesan RhinovirusCoronavirusVirus parainfluenza, no adenovirus.

Fatór sira-ne’ebé kontribui hetan moras IRA;

Relasaun ho individu

Laabarik sira-ne’ebé la simu imunizasaun, bebé ne’ebé la hetan susu hosi inan, bebé no labarik sira menór ho idade tinan ida, sistema imunolojia fraku (daya tahan tubuh lemah), má-nutrisaun, moras krónika, ijiéne pesoál ne’ebé la di’ak.

Relasiona ho ambiente

Mudansa temperatura ambientál, poluisaun (rai-rahun), asinamentu (kepadatan, overcrowding), falta ventilasaun iha uma, fumadór barak (su’ar hosi sigarru bele hasa’e insidénsia ba moras ne’e) no ahi-su’ar.

Transmisaun

Moras Infesaun Vias Respiratóriu Aguda (IRA) transmite ka da’et liuhosi kontaktu direta (koali’a, fani, kabeen) ho ema ne’ebé hetan tiha ona moras ne’e.

Síntoma

Moras Infesaun Vias Respiratóriu Aguda (IRA) sei hatudu sinál no síntoma hanesan; inus been turu no suli ka inus metin, me’ar (me’ar maran), isin kolen ka baruk, isin manas (dalaruma), garganta moras, no ulun moras (dalaruma).

Tratamentu

Tratamentu ba iha moras infesaun vias respiratóriu aguda (IRA) iha oin rua (2) mak tratamentu medikamentoza (ho ai-moruk) no tratamentu non-medikamentosa (la uza ai-moruk).

Tratamentu medikamentoza (ho aimoruk): médiku sira mak sei fó ai-moruk bainhira ita ba hala’o konsulta iha sentru saúde ka iha ospitál.

Tratamentu non-medikamentoza (tratamentu la ho ai-moruk): tratamentu ne’ebé prátiku no ita bela halo hanesan suas ho bee manas nia su’ar, hemu bee no jus barak, deskansa barak no selu-seluk tán.

Prevensaun

Moras infesaun vias respiratóriu fasil tebes atu kona ema maibé fasil tebes mós atu prevene, sé ita iha konsiénsa no kultura saudável. Asaun ka hahalok sira-ne’ebé ita tenke halo hodi prevene moras ne’e mak hanesan; fase liman ho sabaun, hadook aan hosi ahi-su’ar no rai-rahun, taka inus no ibun bainhira fanin ka me’ar, susu-been ekskluzivu ba bebé foin moris to’o fulan neen (6), labele fuma besik, halo vasinasaun, no kuidadu ijiéne pesoál.

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!