Xefe suku Belekasak husu Governu rekruta funsionáriu PNDS iha área tékniku
COVALIMA, 16 agostu 2023 (TATOLI)–Xefe suku Belekasak, Postu Administrativu Maucatar, Leonito Gusmão, husu ba Governu bainhira halo rekrutamentu ba tékniku Programa Nasionál Dezenvolvimentu Suku (PNDS) tenke haree funsionáriu ne’ebé iha área tékniku.
“Ita ko’alia Tékniku Profesionál PNDS iha munisípiu Covalima hanesan autoridade durante ne’e ita haree bainhira tékniku mai ho área tékniku. Ita hakarak halo atendimentu di’ak tékniku sira tenke mai hosi área tékniku duni. Tanba, durante ne’e bainhira badaen husu tékniku sira hatán dehan ha’u mós lahatene,” Leonito Gusmão hateten bainhira hala’o diálogu ho Sekretáriu Estadu Dezenvolvimentu Rurál iha Salaun AMC, Sukaer Laran, kuarta ne’e.
Líder komunitáriu ne’e hateten, bainhira hala’o rekrutamentu tékniku ne’ebé destakadu iha postu no suku, ema-ne’ebé nia área tékniku duni, se bainhira rekruta área la’os tékniku ne’e problema boot.
Nia hateten, Governu tenke halo rekrutamentu tékniku PDNS ema ne’ebé iha ouñesimentu kona-ba área tékniku duni.
“Ami-nia problema seluk mak ohin ha’u-nia kolega xefe suku aprezenta rekruta tékniku PNDS tenke ema-ne’eb é iha bakraun tékniku duni,” nia dehan.
Aleinde ne’e, nia kestiona pontualidade servisu tékniku PDNS nian ne’ebé destaka iha postu administrativu sira, tanba tékniku sira ne’e la hela iha postu, maibé hela iha kapitál munisípiu nune’e hala’o monitorizasaun ba projetu PNDS iha minitu balun de’it.
“Ha’u-nia preokupa ho servisu tékniku Programa Nasionál Dezenvolvimentu Suku (PNDS) ne’ebé destaka iha postu administrativu, la hela iha postu, maibé hela iha kapital Suai, nune’e sai hosi munisipiu tuku 09h00 to’o iha postu tuku q7h00 nlorokoraik, nune’e hala’o monitorizaun durante minitu rua de’it fila ona,” nia hateten.
Batán ba preokupasaun hirak-ne’e, Sekretáriu Estadu Dezenvolvimentu lokál, Mateus dos Santos Tallo , halo anotasaun ba preokupasaun hirak ne’e mai hosi xefi sukue ne’e.
Jornalista : Celestina Teles
Editór : Cancio Ximenes
