GTT Baucau avalia atividade merkadu seguru
BAUCAU, 17 agostu 2023 (TATOLI) – Autoridade Munisipál Baucau liuhosi Grupu Tékniku Traballu (GTT) avalia atividade kona-ba programa Baucau seguru no merkadu seguru.
Sekretáriu Administrasaun Munisipál Baucau, Simão dos Santos Marques Pinhero, esplika, objetivu sorumutu GTT halo avalia atividade iha trimestrál dahuluk no daruak inklui kontinua prepara ba trimestrál rua ikus ba tinan-2023.
“GTT halibur hamutuk atu haree fali planu asaun sira-ne’ebé ezekuta iha trimestrál dahuluk nian hanesan vantajen no desvantajen,” Sekretáriu Administrasaun Munisipál Baucau hateten iha Vila Nova, kinta ne’e.
Iha avaliasaun ne’e, atividade ne’ebé iha vantajen sei mantein, enkuantu desvantajen sei presiza hadi’a, ne’ebé hahú implementa iha tinan-2020 hamutuk ho parseiru dezenvolvimentu hanesan UN Homen, TOMAK np NGO lokal sira iha Baucau.
Programa Baucau seguru no merkadu seguru ho objetivu atu reforsa papél feto, ema ho defisiénsia iha vida negósiu hodi apoia ekonomia.
Vantajen hosi programa ne’e mak atividade implementa hanesan sensibilizazaun ba alvu sira, liuliu koñesimentu ba vida negósiu inklui prepara abilidade iha parte organizasaun hanesan formasaun hosi parseiru dezenvolvimentu.
Desvantajen mak mudansa estrutura governasaun nune’e laiha konsentrasaun di’ak ba grupu alvu sira no orsamentu limitadu tanba presiza ajusta tuir programa governu ne’ebé labele implementa ho totalmente maibé tenke fazeadamente.
“Ita kontinua nafatin ho programa hanesan formasaun no ajusta ideia hosi membru GTT sira hodi implementa iha atividade tuir mai,” Simão Pinheiro akresenta.
Autoridade Munisipál Baucau halao akordu ho parseiru dezenvolvimentu hanesan UN Homen no TOMAK kona-bá kriasaun merkadu saudável ho durasaun serbisu tinan-haat ho objetivu kria espasu seguru iha merkadu ne’ebé tuir planu sei implementa iha merkadu foun Tuanau.
Totál vendedór ne’ebé hala’o atividade iha merkadu Baucau hamutuk na’in-898 mak harii ona Asosiasaun Vendedór Merkadu Baucau ho tipu negósiu hamutuk 12.
Jornalista : Natalino Belo
Editór : Evaristo Soares Martins
