Komisaun C sei halo relatóriu paresér ba proposta OR 2023
DILI, 17 agostu 2023 (TATOLI)—Komisaun C trata asuntu Finansa Públika iha Parlamentu Nasionál (PN), durante loron rua 15-16 agostu ne’e finaliza ona audiénsia públika ho Governu ba proposta-lei Orsamentu Retifikativu (OR) ba 2023, nune’e sei halo relatóriu paresér.
“Horisehik ami konklui ona audiénsia konjunta ne’ebé realiza iha plenária hamutuk ho membru Governu sira. Nune’e, ohin, fó tempu de’it ba ami komisaun C atu halo relatóriu paresér no mós komisaun sira seluk prepara paresér setoriál hodi submete mai komisaun C, depois konjuntamente ami sei hato’o paresér ne’e hotu ba meza Parlamentu Nasionál,” Prezidente Komisaun C, Deputada Cedelizia dos Santos, hateten ba jornalista sira iha PN, kinta ne’e.
Audiénsia públika ne’e komisaun konvida Ministériu Finansa no entidade balun hodi ko’alia kona-ba alterasaun dahuluk ba proposta-lei númeru 15/2022, 21 dezembru, Orsamentu Jerál Estadu (OJE) ba 2023, lei númeru 2/2022, 10 fevereiru Enkuadramentu Orsamentál Jerál Estadu no Jestaun Finansa Públika no alterasaun daruak lei númeru 8/2008, 30 juñu, lei Tributária,
Nia dehan, audiénsia hala’o durante loron rua 15-16 agostu ne’e, maibé tuir planu loloos ramata iha loron 17 agostu ne’e, tanba iha loron ikus audiénsia Deputadu sira laiha ona pedidu intervensaun no parte Governu liuhosi Vise Ministru Finansa no membru governante relevante balun halo esplikasaun klaru tebes, entaun preokupasaun sira-ne’ebé levanta hosi Deputadu resposta hotu ona hosi membru Governu.
Tuir ajenda komisaun C iha loron 18 fulan-agostu sei iha konvokatóriu hodi halo aprovasaun ba relatóriu paresér hafoin sei submete direta kedas ba meza PN hodi kontinua ajenda ba diskusaun iha faze jeneralidade.
Deputadu Cedelizia fó sai katak tuir kalendáriu ne’ebé konkorda hamutuk iha reuniaun líder bankada posibilidade diskusaun proposta OR ba 2023 iha faze jeneralidade hahú iha loron 21 agostu, no iha 22-23 agostu diskute faze espesialidade no 24 agostu aprovasaun finál globál.
Iha reuniaun plenária 14/08/2023 aprova ona projeitu deliberasaun debate ho karáter urjénsia ba proposta lei OR.
Jornalista : Nelson de Sousa
Editór : Cancio Ximenes
