Konstrusaun UNP+ A iha Maucatar balun paradu
COVALIMA, 17 agostu 2023 (TATOLI)–Xefe suku Belekasak no suku Matai, postu administrativu Maucatar preokupa ho progresu konstrusaun Uma Naroman ba Povu) Plus A (UNP+ A) ne’ebé hala’o konstrusaun iha postu Administrativu Maucatar ne’e balun to’o agora paradu tanba falla iha fornesimentu materiál konstrusaun.
“Uma Naroman ba Povu Pus A (UNP+ A) ne’ebé nia progresu konstrusaun kuaze 80-90% hein tara odamatan, iha postu administrativu Maucatar iha nia suku haat (4) ne’ebé kada suku ida konstrui UNP Plus A unidade 19, maibé suku Ogues de’it hetan UNP unidade 18 sai problema ba ami. Primeiru, fallansu fornesedór materiál, maske projetu la’o hela maibé agora paradu,” Xefe Belekasak, postu Maucatar, Leonito Gusmão, hateten iha salaun AMC, Sukaer Laran.
KOnstrusaun paradu, nia hateten, tanba osan mak laiha no diretór PNDS munisípiu halo kolokasaun ba nasionál maib’e seidauk simu orientasaun, nune’e seidauk iha diretór tanba bainhira atu asina dokumentu balun labele asina tanba laiha autorizasaun.
Hafoin koloka diretór PNDS Munisípiu Covalima ba iha nasionál, tuir lidér komunitária sira-nia observasaun progresu konstrusaun UNP+ A iha postu Maucatar ladún la’o.
Ho nune’e, nia rekomenda ba Governu bainhira diretór PNDS munisípiu koloka ba nasionál, tenke iha ona diretór foun atu asina dokumentu nune’e prosesu kontinua bele la’o.
Aleinde ne’e, nia mós preokupa kona-ba ekipa Jestaun Suku (EJS) mai hosi suku, bainhira fornesedór materiál la prienxe kategória, entaun ekipa jestaun suku jere osan, ida-ne’e problema boot.
“Iha problema fornesedór la tama kategoria ekipa Jestaun Suku (EJS) sei jere rasik. Iha suku, ita hatene sira-nia kapasidade sira mak jere problema boot durante ami akompaña kapasidade sira tenke liga ho empreza nasionál no lokál iha munisípiu,” nia dehan.
Xefe suku Matai, postu Maucatar, João Gusmão, hateten hodi hato’o preokupasaun hanesan ho xefe suku Belekasak kona-ba konstrusaun Uma Naroman ba Povu Plus A (UNP+ A) iha postu administrativu Maucatar, munisípiu Covalima.
“Postu Maucatar, ha’u-nia preokupasaun hanesan ho maluk xefe suku belekasak konstrusaun UNP+ A iha suku Matai hetan UNP unidade 19 ne’ebé progresu konstrusaun kauze 50% ba leten, hein atu taka zinku balun komesa revoka ona hein taka no nahe laran,” nia hateten.
Tuir dadus ne’ebé jornalista Agência Tatoli asesu hosi eis diretór Programa Nasionál Dezenvolvimentu Suku, Filipe Carodoso, konstrusaun Uma Naroman ba Povu Plus A ho totál unidade 75 ne’ebé iha munisípiu Covalima implementa iha postu Maucatar.
UNP+ A ho unidade 75 ne’ebé iha postu administrativu Maucatar ne’ebé implementa iha kada suku hanesan suku Belekasak implementa UNP+ A unidade 19, suku Holpilat unidade 19, Matai unidade-19, suku Ogues mak konstrusaun UNP+ A unidade 18.
Jornalista : Celestina Teles
Editór : Cancio Ximenes
