PR promove ofisiál jenerál no ofisiál superiór na’in-lima
DILI, 17 agostu 2023 (TATOLI)—Prezidente Repúblika (PR), José Ramos Horta, kinta (17 agostu) ne’e, promove ofisiál jenerál na’in-tolu no ofisiál superiór na’in-rua FALINTIL Forsa Defeza Timor-Leste (F-FDTL).
Dekretu Prezidente Repúblika 15 agostu promosaun ba postu majór jenerál, Prezidente Repúblika liuhosi proposta Governu hafoin delibera reuniaun Konsellu Ministru 10 agostu tuir termu númeru 2 artigu 74 iha konstituisaun RDTL, dekreta hodi promove postu majór jenerál, kompostu hosi Brigadeiru Jenerál Américo Ximenes ‘Sabika Besi Kulit’ ba postu Majór Jenerál, Brigadeiru Jenerál João Miranda ‘Aluk Descartes’ ba postu Majór Jenerál.
Enkuantu, dekretu Prezidente Repúblika promosaun Koronél José da Costa Soares ‘Trix’ ba postu Brigadeiru Jenerál, no Kapitaun Mar e Guerra Higino da Neves ba postu Komodoru.
Xefe Estadu Maiór Jenerál F-FDTL, Tenente Jenerál Falur Rate Raek hateten promosaun ne’ebé ohin hala’o hanesan afirmasaun konfiansa ne’ebé nasaun fó, kumpre dever no asume ho responsabilidade.
“Felisita ba kargu foun saúde di’ak no susesu, ba kadajenerál ne’ebé demostra kapasidade ho determinasaun boot no lealdade durante luta libertasaun nasionál, ba kada jenerál hanesan figura ne’ebé orgullu kontinua serbi F-FDTL to’o momentu ne’e. Hosi promosaun ida-ne’e sinál gratidaun no apresu patria no instituisaun. Ba Komodoru Higino no Brigadeiru Trix, promosaun ida-ne’e signifika faze transisaun ba jerasaun tuir mai, reflete mós imi-nia serbisu ba nasaun no forsa armada, responsabilidade boot liután ho forma lidera, inspira, dalan ba oin ezije mais konfiante, imi-nia esperénsia baze sólida kompeténsia lideransa hodi hasoru dezáfiu,” nia hateten iha diskursu iha serimónia pose iha Palásiu Prezidensiál Nicolau Lobato, Bairru Pite.
Falur hato’o agradesimentu ba IX Governu Konstituisionál hodi simu proposta hosi komandu F-FDTL nune’e bele realiza eventu ne’e.
Entertantu, serimónia promosaun ne’e partisipa hosi Prezidente Repúblika, José Ramos Horta, Primeiru Ministru, Kay Rala Xanana Gusmão, órgaun soberania Parlamentu Nasionál ho Tribunál Rekursu, eis titular órgaun soberania, militár no konvidadu sira seluk.
Jornalista : Nelson de Sousa
Editór : Cancio Ximenes
