Primeiru-Ministru enkoraja F-FDTL proteje rikusoin iha tasi-mane

DILI, 17 agostu 2023 (TATOLI)–Primeiru-Ministru (PM), Kay Rala Xanana Gusmão, enkoraja membru FALINTIL-Forsa Defeza Timor-Leste (F-FDTL) atu servisu maka’as hodi proteje rikusoin Timor iha tasi-mane.

“Polísia nia misaun maka serbí no proteje ukun na’in sira-nia atu halo buat ruma hanesan hadi’a povu nia moris, enkuantu Militár eziste atu prepara-an, liu-liu agora ita iha ona greater sunrise ita atu hahú, maibé iha tasi-mane ne’ebá ema na’ok ita-nia ikan, estraga ikan. Tanba ne’e, forsa sira tenke tau iha sira-nia ulun atu defende rikusoin rai ida ne’e nian,”  Xanana fó bainhira hala’o vizita ba Sentru Formasaun Akademia Polísia, Comoro, kinta ne’e.

Notísia relevante : Sai PR, Lú-Olo hakarak fortifika F-FDTL asegura rikusoin tasi Timór

Xefe Governu dehan, inan-aman sira ne’ebé mate tiha ona la husu buat ida, maibé sira mate tanba rai ida-ne’e no ninia rikusoin.

“Ne’e duni forsa sira lalika hanoin atu ba halo funu iha Ukrania, maibé prepara-an hodi ba kontrola ita-nia tasi-mane ne’ebé rai barak haruka sira-nia ró boboot mai kaer hotu ita-nia ikan iha tasi. Ida-idak ho ninia misaun, maibé ita hamutuk ho hanoin ida serbí rai ida-ne’e no proteje povu ida-ne’e lori rai ba dezenvolvimentu,” nia tenik.

Iha biban hanesan, Hatán ba Xefe ezekutivu ninia preukupasaun, Xefe Estadu-Maiór Jenerál F-FDTL, Tenente Jenerál Falur Rate Laek, hateten militár prontu ezekuta de’it orden.

“Ami kumpre orden de’it, ha’u hateten ba Primeiru-Ministru katak rekursu umanu iha ona importante Governu investe iha ekipamentu no buat hotu iha ita kumpre misaun,” Falur salienta.

Nune’e mós, Ministru Defeza, Donaciano do Rosário Gomes, hateten, bainhira atu tau-matan ba tasi tenke iha meiu sufisiente no di’ak atu proteje ita-nia rikusoin to’o iha greater sunrise para lori osan barak mai bele halo ita-nia ema moris di’ak no labele baku malu bebeik.

“Presiza proteje ita-nia rikusoin ne’e, ita labele ko’alia de’it maibé tenke halo buat ruma,” Ministru fó hanoin.

Jornalista     : Antónia Gusmão

Editora          : Julia Chatarina