TL-EUA hametin koperasaun iha área dezenvolvimentu seguransa no defeza
DILI, 17 agostu 2023 (TATOLI)—Prezidente Repúblika (PR), José Ramos Horta, kinta ne’e simu audiénsia hosi Enkarregadu Negósiu Embaixada Estadu Unidu Amérika (EUA) iha Timor-Leste, Marc Weinstock, hodi ko’alia kona-ba relasaun no parseria entre nasaun rua.
Enkarregadu Negósiu Embaixada Estadu Unidu Amérika (EUA) iha Timor-Leste ne’e hateten, EUA ho Timor-Leste hametin nafatin kooperasaun iha área dezenvolvimentu seguransa no dezenvolvimentu defeza.
“Prontu prinsipál hosi enkontru ho Prezidente Repúblika mak introdús ha’u-nia aan ba Xefe Estadu, no ko’alia kona-ba relasaun no parseira entre Estadu Unidu Amérika (EUA) iha Timor Leste. Mezmu, ha’u ho ha’u-nia família foin to’o iha loron domingu liu ba, interresante kona-ba povu no kultura Timor-nian,” Enkaregadu Negósiu, Marc Weinstock, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Nia dehan, iha sorumutu hala’o diskusaun di’ak tebes ho PR kona-ba kooperasaun ne’ebé Governu rua, EUA ho Timor Leste bele halo.
Durante enkontru, Xefe Estadu korajen hodi kontinua ka profunda nafatin kooperasaun iha área ne’ebé identifika hamutuk.
Jornalista : Nelson de Sousa
Editór : Cancio Ximenes
