DILI, 18 agostu 2023 (TATOLI) – Juventude Rezisténsia Carlos Boromeo da Silva alias “Acalo Choque”, husu ba joven sira atu labele kria konflitu maibé prioriza ba estudu, buka servisu hodi hadia moris no kontribui ba dezenvolvimentu nasaun nian.
“Husu ba ha’u nia alin joven sira, agora oportunidade barak mak iha, haree formasaun ruma ba tuir, haree eskola no estudu makas tanba futuru iha imi-nia liman, ami sira ne’e idade avansadu, futuru rai ida ne’e iha imi-nia liman”, Acalo dehan ba Agência TATOLI iha estúdiu Farol, ohin.
Acalo husu ba inan ho aman sira atu eduka oan sira atu labele hamosu konflitu iha fatin ne’ebé de’it, ´tantu iha rai-laran no mós iha rai-liur, hirak ne’ebé iha estranjeiru bainhira fila fali tenke kontribui ba dezenvolvimentu Timor-Leste nian.
“Husu ba alin joven hotu, laiha ona valór bainhira kria konflitu ba malu bebeik iha tempu ida agora ne’e, konflitu ne’ebé uluk ami halo husik hela ba ami tanba ami-nia konflitu ho objetivu ida de’it katak hakarak ita hetan URA, maibé ita hetan ona ita tenke aproveita oportunidade sira ho di’ak hodi dezenvolve ita-nia nasaun”, nia revela.
“Konflitu ne’ebé agora mosu la’os maioria joven sira hotu maibé iha individu balun, ida ne’e menus iha edukasaun liuliu inan-aman sira tenke eduka ita-nia oan halo didi’ak, ha’u haree iha nasaun ne’e edukasaun mak sei fraku ne’e mak konflitu mosu barak ne’e”, nia hakotu.
Jornalista: Hortencio Sanchez
Editór : Zezito Silva
