DILI, 19 agostu 2023 (TATOLI)-Xefe Estadu Maiór Jenerál Falintil-Forsa Defeza Timor-Leste (F-FDTL), Tenente Jenerál, Domingos Raul ‘Falur Rate Laek’ husu ba joven sira atu sai simbolu pás iha sosiedade.
Tanba agora daudaun ne’e joven barak gosta mete nia aan ba iha problema, la rona inan-aman rasik inklui nia lider sira nune’e hamosu konfrontu iha sosiadade.
“Husu joven sira hakmatek. Joven sira tenke sai símbolu ba pás. Agora ne’e, joven barak rona fali ema seluk (terseira pessoa) la’ós rona sira-nia aman rasik no inan rasik no sira nia lider,” Falur Rate Laek’ ba jornalista sira hafoin kari Ai-funan hodi fó onra ba martír sira iha Semitériu Jardin Herois da Pátria, Metinaro, sábadu ne’e.
Falur dehan, joven sira tempu agora fi’ar fali kultura ida mai hosi rai-li’ur duke nian inan-aman no lider sira ne’e mak halo joven sira naksobu.
“Sira la rona nia inan-aman rasik. Sira rona fali ema sira ne’ebé lori fali sira-nia kultura ida ne’ebé mai hosi rai-li’ur ne’ebá mai halo agora sobu sira. Tanba ne’e, husu joven sira agora tenke halakon ida ne’e,” nia adianta.
Xefe Estadu Maiór Jenerál F-FDTL, Tenente Jenerál, Domingos Raul ‘Falur Rate Laek’, husu ba joven sira agora tenke banati tuir espiritu joven sira uluk iha tempu rezisténsia nian.
“Joven sira nee uluk iha funu laran agora katuas hotu ona uluk ita bolu dehan sira ne’e motór aranka prosesu luta libertasaun nasionál, agora sira ne’e kontinua motór aranka ba prosesu dezenvolvimentu,” Falur enkoraja.
“Tanba husu joven sira agora enke aranka hodi partisipa iha ne’ebé de’it ba buat ne’ebé di’ak la’ós ba fali buat ne’ebé aat,” nia afirma
Kari Ai-funan
Entratentu, iha sábadu ohin (19/8) Xefe Estadu Maiór Jenerál Falintil-Forsa Defeza Timor-Leste (F-FDTL), Domingos Tenente Jenerál Raul ‘Falur Rate Laek’, hamutuk ho membru Governu, membru Parlamentu Nasionál inklui Ofisiál Superiór F-FDTL no jerasaun patrióta sira realiza misa agradesimentu iha Kuartel Jenerál F-FDTL Fatuhada. Hafoin missa agradesimentu, kari ai-funan iha Semitériu Jardim Herois da Pátria Metinaro hodi komemora aniversáriu FALINTIL ba dala-48 tinan ne’e.
“Ita mai fó omenajen ba sira ne’ebé mak mate ona hanesan Nicolau Lobato, Xavier do Amaral, Nino Konis Santana ho membru Komite Sentrál barak-barak sub- rejiaun ai-laran, soldadu, borometu no sira ne’ebé mate ita hakoi iha ne’e no sira ne’ebé ita lahakoi iha ne’e. Ohin ita mai hanain fó onra ba ita-nia luta-na’in sira ne’e,” Tenente Jernerál Falur haktuir.
Jornalista: Natalino Costa
Editór : Rafael Ximenes de A. Belo
