COVALIMA, 19 agostu 2023 (TATOLI) – Komadante Polísia Nasionál Timor-Leste, Superintendente, Calisto Gonzaga, husu ba sidadaun-sira atu kria pás no estabilidade, durante loke feira, iha ámbitu hodi komemora loron Forsa Armada Libertasaun Nasionál (FALINTIL) no Konsulta Populár, iha munisípiu Covalima.
“Parte seguransa fó hanoin ba joven-sira no ba ita-hotu tenke kria estabilidade, trankuilidade, pás iha ita-nia uma-laran, ba ita-nia sosiedade, nune’e bele realiza feira to’o remata. Ha’u fiar katak ema ne’ebé halo sala la’ós sala bebeik, tanba iha esperénsia nia sei halo di’ak liu,” Superintendente, Calisto Gonzaga, hato’o liuhusi nia diskursu, iha Kampu Suai-Loro, Covalima, ohin.
Autoridade polisiá ne’e afirma, joven tenke firmi, fó instrumentu la iha rezerva ba asuntu ne’ebé hakarak kontribui iha Covalima. Tanba, Covalima iha infraestrutura sufisiente hanesan auto-estrada no riku soin; mina. Iha fatin seluk la iha. Lalika halo pertubasaun.
“Ha’u husu ba joven-sira, ba ita hotu tenke kuidadu saúde no hahalok tenke hatudu jerasaun husi Covalima; ha’u mak garante. Kuandu ita uza sala, ita sei lakon oportunidade,” nia fó hanoin.
Komandante ne’e apela mós ba ema sira ne’ebé loke ‘bola guling’ ka jogu na’in sira seluk katak durante feira iha munisípiu Covalima, tenke tau importánsia ba asuntu seguransa.
“Ha’u husu ba jogu bola guling, kuru-kuru la’ós de’it ita-boot bele hetan lukru maibé tau importánsia seguransa ba munisípiu. Ita-boot sira loke jogu tanba pasa ona iha regra no prosedimentu ne’ebé atu bele loke nune’e ha’u mós la autoriza labarik atu taka bola guling,” nia reafirma.
Iha biban ne’e, Administradór Munisípiu Covalima, Francisco de Andrade fó hanoin ba sidadaun sira durante loke feira labele hamosu konflitu, bainhira hamosu konflitu komandante PNTL ho nia membru sira atua, halo asaun.
“Ha’u fó atensaun atu labele hamosu konflitu tanba bazeia ba tema ‘Harii unidade pás no estabilidade iha Covalima’. Se hamosu konflitu iha konsekuénsia tanba komandante hateten labele hamosu konflitu. Konflitu labele sai fali kultura Covalima, maibé kultura Covalima mak pás no estabilidade,” nia reiteira.
Objetivu loke feira ho nia sentidu molok atu tama loron FALINTIL, 20 agostu no loron Konsulta Populár 30 agostu, atu harii unidade, pás no estabilidade iha Covalima ba ema-hotu.
Autoridade mós fó hanoin ba sidadaun-sira ne’ebé loke jogu, tenke iha hanoin nune’e; bele loke feira ho di’ak, labele hamosu konflitu.
“Grupu bola guling, kuru-kuru ho hanoin-ida, oinsá ita bele realiza feira to’o finaliza. La hamosu konflitu. Ha’u haruuk ba komunidade Covalima feira ida-ne’e seguransa la’ós de’it iha PNTL, maibé seguransa iha ita hotu nia liman,” autoridade munisipál ne’e realsa.
Iha ámbitu komemorasaun loron FALINTIL 20 agostu no loron Konsulta Populár Munisípiu Covalima realiza atividade hodi anima komunidade sira hanesan, kompetisaun kalera kuda, kompetisaun sertame ba estudante ensinu báziku-sira no kompetisaun te’in hahan lokál.
Entertantu, atu komemora loron FALINTIL 20 agostu no loron Konsulta Populár 30 agostu , Covalima aloka orsamentu $ 7,878,75; ne’ebé aloka boot liu ba atividade kompetisaun kalera kuda, kuaze 4.000-resin ne’ebé fahe ba preparasaun fatin aloka $ 900 no orsamentu fó prémiu ba vensedór husi klase B, C, D no E aloka hamutuk $ 3,525 .
Jornalista: Celesina Teles
Editór: Rafael Ximenes de A. Belo
