DILI, 20 agostu 2023 (TATOLI) – Prezidente Parlamentu Nasionál, Maria Fernanda Lay prezide serimónia aniversáriu FALINTIL ba dala-48 (1975-2023), ne’ebé mak hala’o iha Kuartel Jenerál Fatuhada, Dili, iha loron 20 agostu 2023.
Prezidente Parlamentu Nasionál nu’udar feto dahuluk ne’ebé pasa revista ba parada militár, ne’ebé akompaña hosi Komandante Parada, Tenente Koroné Abel da Costa Xavier ‘Niki’.
Xefe Estadu Maiór Jenerál F-FDTL, Tenente Jenerál Falur Rate Laek, konsidera prezensa Prezidente Parlamentu Nasionál, iha serimónia boot ida-ne’e sai nu’udar fonte satisfasaun no orgullu ba sira.
“Tanba foin primeira-vez prezide hosi feto, ida ne’e mós nu’udar sinál pozitivu ida ba evolusaun ne’ebé akontese iha ita-nia nasaun, ne’ebé hahú ho luta ba independénsia no libertasaun nasionál, ne’ebé hakarak loke odamatan ba oportunidade ne’ebé hanesan ba ema hotu, mane no feto hodi estabelese sosiedade ida-ne’ebé justu, livre, inkluzivu, iha ne’ebé tenke halakon kualkér fatór opresaun ka limitasaun ba dezenvolvimentu ita-nia povu, mane no feto ne’ebé luta ona ho sakrifísiu ne’ebé boot”, Tenente Jenerál Falur hateten iha ámbitu komemorasaun loron FALINTIL ba dala-48, iha Fatuhada.
Falur dehan, haree ba prezensa Prezidente Parlamentu Nasionál nian iha loron 20 agostu, ita fó omenajen ba inan-feton ne’ebé, liuhosi sakrifísiu hotu ne’ebé sira hasoru, dala barak fó motivasaun no forsa ba funu-na’in sira ba liberdade.
“Tan ne’e, ita boot-nia prezensa mak motivasaun boot ba ami hotu. Ami kontente tebes no fó motivasaun hosi prezensa Prezidente Parlamentu Nasionál iha serimónia ne’e. Nune’e mós atu fó gloria no fó onra ba ita-nia eroina sira ne’ebé fó sira-nia moris ba ita-nia rai”, Falur orgullu.
Partisipa iha komemorasaun loron FALINTIL ne’e mai hosi Prezidente Parlamentu no membru sira, membru Governu balun, korpu diplomátiku, veteranu no família boot F-FDTL.
Jornalista : Antónia Gusmão
Editór : Zezito Silva
