DILI, 20 agostu 2023 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Domingos Raul ‘Falur Rate Laek’ husu ba Estadu atu investe makas ba Autoridade Marítima espesialmente fasilidade sira atu bele kontrola tasi Timor-Leste.
Nia dehan, Timor-Leste identifika ho klaru ona iha ninia estrátejia nasionál katak tasi nu’udar fetór fundamentál ida atu sustenta vida Estadu nian.
Tanba ne’e, importante atu kria kondisaun sira atu bele realiza mehi ida-ne’e, ne’ebé sei bele bainhira ita hatene oinsá atu trata ho efetivu ita-nia pozisaun jeostratéjika, jere ho efetivu rekursu sira ne’ebé folin boot iha espasu tasi nian no asume responsabilidade sira hanesan Estadu insular ka illa ida, liuliu iha asuntu seguransa marítima no protesaun ambientál.
“Atu asume responsabilidade hirak-ne’e, mak tenke fó atensaun barak liután ho meiu no kapasidade sira, hodi hala’o operasaun sira kona-ba vijilánsia, patrolla, buka no salva iha area juridisaun nasionál”, Tenente Jenerál, Falur Rate Laek iha nia diskursu durante serimónia komemorasaun aniversáriu FALINTIL ba dala-48 iha Kuartel Jenerál F-FDTL, Fatuhada, domingu ne’e.
Nia dehan, F-FDTL hakarak sai hanesan konstrutór ba pás, kontribuidór ba dezenvolvimentu no defensór ba Estadu direitu demókratiku.
“Ami prontu atu servisu hamutuk ho parte hotuhotu hodi implementa ho sériu”, nia afirma.
Falur hateten, F-FDTL sempre fó importánsia bo’ot ba relasaun internasionál nu’udar misaun sekundária, buka habelun ho nasaun viziñu sira hanesan Austrália, Indonézia no nasaun belun sira iha ASEAN no buka mós partisipasaun atu hametin setór Defeza CPLP nian.
Inklui mantein mós relasaun ho ita-nia parseiru bilaterál sira, hanesan Portugal, Brazil, Estadus Unidus Amerika, Nova Zelandia, Malázia, Japaun, Xina, India, Korea Sul, Filipina no seluk tan,
Ne’ebé prontu, atu servisu hamutuk hodi promove dezenvolvimentu ne’ebé metin no estavél ba relasaun bilaterál sira, bazeia ba respeitu ba malu. igualdade, benefísiu ba malu no la interfere iha asuntu internu nasaun seluk nian.
“Atu proteje no kontribui ba pás, F-FDTL defende, promove no kontribui atu reforsa kooperasaun bilaterál liuhosi koloka adidu defeza sira, ne’ebé daudaun iha Austrália, Indonézia, Portugal no la kleur tan iha Xina”, Falur konklui.
Jornalista: Natalino Costa
Editór : Zezito Silva
