BAUCAU, 21 agostu 2023 (TATOLI) – Autoridade suku Fatulia husu Ministériu Edukasaun liuhosi Servisu Munisipál Edukasaun atu loke Eskola Báziku Filiál (EBF) tanba fatór distánsia.
Xefe suku Fatulia, postu administrativu Venilale, Angelino Moisés Perreira, esplika, liuhosi enkontru konsellu suku hamutuk ho komunidade deside ona atu loke Ensinu Báziku Sentrál Filiál (EBF) tanba maioria estudante hosi suku refere tenke la’o-ain ho distánsia dook purvolta kilómetru hitu hodi to’o iha EBC Venilale Vila.
“Ami koordena ona ho edukasaun maibé verbál hela, tempu badak seidauk halo pedidu atu estabelese eskola ne’e iha Fatulia,” Xefi suku Fatulia informa ba Agência TATOLI iha Vila Nova, segunda ne’e.
Autoridade suku koordena ona ho EBF Venilale inklui sei enkontru tán ho komunidade nune’e provizóriu sei utiliza edifísiu eskola primeiru siklu tanba minimiza la’o-ain no kole liuliu iha tempu udan tanba distánsia dook.
Pedidu ne’ebé sei hato’o ba edukasaun hanesan orsamentu inklui husu manorin-na’in sira atu nune’e iha tinan letivu 2024 bele hahú ona prosesu aprendizajen iha suku refere.
“Sé bele planu ne’e hahú prosesu aprendizajen iha tinan 2024,” Angelino Perreira akresenta.
Suku Fatulia hamutuk aldeia haat komposta hosi Bahadato, Osso-uaque, Uai-to-Bono no Uatulia-ana ho totál populasaun 2.721 hosi uma-kain 688.
Jornalista : Natalino Belo
Editór : Evaristo Soares Martins
