Benefisiáriu UNP+ B iha Labarai troka ona zinku iha maiu
COVALIMA, 21 agostu 2023 (TATOLI)–Programa Nasionál Dezenvolvimentu Suku (PNDS) ne’ebé implementa programa Uma Naroman ba Povu plus B (UNP+ B) ba benefisiáriu uma-kain 37 iha suku Labarai, postu Suai, munisípiu Covalima, agora daudaun finaliza ona troka zinku ne’ebé feruzen iha fulan-maiu tinan 2023.
“Ita-nia responsabilidade Administradór hamutuk ho ekipa programa Nasionál Deenvolvimentu Suku (PNDS) postu mak tun halo verifikasaun. Bazeia verifikasaun, durante ne’e befisiáriu sira troka hotu ona zinku iha maiu 2023,” Xefe Suku Labarai, Mouzinho Amarál, hateten ba Agência Tatoli iha resintu AMC, Sukaer Laran, segunda ne’e.
Implementasaun UNP ho kategória UNP+ A no B ne’ebé hala’o postu administrative Maucatar, implementasaun UNP+ A no iha postu administrativu Suai ne’ebé implementa UNP+ B ne’ebé kada suku iha benefisiáriu uma-kain hamutuk 37.
Tuir administradór Postu suai, halo verifikasaun dadus ema ne’ebé kandidatu UNP+ B iha suku Labarai hamutuk uma-kain 37 ne’ebé daudaun ne’e benefisiáriu-sira troka ona zinku.
Suku Labarai, postu administrativu Suai, munisípiu Covalima iha nia aldeia-sira hanesan Mucbelis, Roec, Bonuk, Holba no Meop.
Antes ne’e, iha 02 fevereiru 2023, eis Ministru Administrasaun Estatál (MAE) Miguel Perreira de Carvalho, akompañadu hosi eis Vise Ministru Ministru Administrasaun Estatál (MAE), Lino de Jesus Torrezão, lansa distribui kalen Uma Naroman ba Povu Plus B (UNP+ B) ba benefisiáriu iha postu administrativu Suai, munisípiu Covalima.
Aleinde ne’e, eis Diretór PNDS Covalima, Filipe Cardoso, fó sai dadus katak implementasaun programa Uma Naroman ba Povu plus B, ne’ebé implementa iha postu administrativu Suai iha suku lima (5) ho uma unidade 185.
Programa UNP+ B, Governu implementa iha postu administrativu Suai, munisípiu Covalima iha suku Camanasa, Suai Loro, Debos, Beco no Labarai.
Jornalista : Celestina Teles
Editór : Cancio Ximenes
