COVALIMA, 21 agostu 2023 (TATOLI)—Implementasaun Programa Mão de Obra Postu Administrativu (PMOPA) faze daruak iha suku Labarai, postu administrativu Suai, munisípiu Covalima finaliza ona.
“Implementasaun programa Mão de Obra Postu Administrativu (PMOPA) faze daruak iha suku Labarai, iha aldeia Bonuk, Mukbelis no Meop, finaliza ona no halo ona pagamentu ba traballador sira. Programa prióridade sira mak hanesan hala’o limpeza jerál, hamoos baleta no halo lutu ba bee-matan no kuda ai-horis sira,” Xefe suku Labarai, Mouzinho Amarál, hateten ba Agência Tatoli iha resintu AMC, Sukaer Laran, segunda ne’e.
Implementa PMOPA faze daruak iha aldeia Bonuk ho prióridade programa halo lutu haleu bee-matan no kuda ai-horis, nune’e bainhira tempu bailoron, bee labele maran. Aldeia Mukbelis prióridade hamoos baleta no estrada públiku hahú hosi kruzamentu aeroportu sa’e mai iha bairru Holbelis, hafoin kontiua ba iha eskola báziku filial, bairru Holbelis no hamoos simitériu ne’ebé Timor GAP konstrui.
Iha aldeia Meop ne’e, ho programa prióridade mak hamoos estrada hosi okupasaun Indonézia hosi aldeia Meop ba iha tasi, ida-ne’e oinsá atu fasilita komunidade ba toos no mós bele fasilita komunidade sira fila-liman bele asesu estrada no ONG Belun mós kuda ai-parapa iha tasi ibun.
Iha aldeia Holba, programa prióridade mak hamoos baleta hosi estrada públiku bairru Lonsele besik mota Rai Ketan mai iha sede suku sa’e ba simitériu Holba, antes ne’e kompañia roman juniór loke estrada.
“Iha implementa PMOPA ami submete proposta atu hamoos Estrada, nune’e Governu bele tau matan ne’ebé traballadór sira servisu durante loron 20 ekipa dahuluk servisu durante loron 10 ho ema-na’in 20 no ekipa daruak servisu durante loron 10 ho ema nain-20 ne’ebé dirije hosi xefe aldeia ida-idak,” nia heteten.
Implementasaun programa PMOPA iha suku Labarai, postu administrativu Suai, munisípiu Covalima, trabaldlaór sira hahú hala’o servisu iha loron 18 fulan-jullu tinan 2023 ne’ebé traballadór sira-ne’e hala’o servisu balun to’o de’it loron 10 no balun to’o loron 20.
Antes ne’e, Sekretáriu Administrasaun Munisípiu Covalima, Francisco de Jesus Alves, hateten implementasaun programa Mão de Obra Postu Administrativu kada postu administrativu ho nia orsamentu rihun 100 ne’ebé ho nia ezekusaun faze dahuluk ezekuta 50% no faze daruak 50%.
Jornalista : Celestina Teles
Editór : Cancio Ximenes
