Joven presiza firme hatutan istória pasada TL ba futuru prósperu
DILI, 21 agostu 2023 (TATOLI)–Ministru Asuntu Kombatente Libertasaun Nasionál (MACLN), Gil da Costa Monteiro “Oan Soru”, hatete joven presiza hametin no firme hodi hatutan istória pasadu sira Timor-Leste nian ba futuru ne’ebé prósperu.
Notísia Relevante: MAKLN atribui sertifikadu orden Komandante em Xefe FALINTIL Xanana Gusmão ba KSETL
Nia hatutan, liuhosi pasadu sira-ne’e atu halo reflesaun maibé la’ós ho sentimentu, atu hametin pozisaun no firmeza hodi prepara-aan di’ak no hatutan ba jerasaun ba jerasaun, hodi hakat ba oin tanba Timor-Leste nia luta mai hosi ema hotu-hotu nia kontribuisaun.
“Barak mak ko’alia kona-ba istória maibé barak mós nega malu. Uluk, ita haree malu, maibé ikus-ikus ne’e ita barak mak hateke malu la hetan. Uluk, ita valoriza malu maibé agora lae, ha’u imi-nia oan, imi-nia alin, imi-nia kompañeiru, ha’u imi-nia kamarada ne’ebé durante ne’e hamutuk ho imi la sai ema perfeitu maibé ita koko tulun malu atu hakat ba oin atu valoriza ita-nia istória. Mai ita hametin ita-nia forsa, hametin ita-nia unidade hodi valóriza ita-nia ístoria,” Governante ne’e hateten liuhosi nota ne’ebé Agência Tatoli asesu, segunda ne’e.
Tuir nia, luta ba Timor-Leste ne’e kontibuisaun ema hotu nian, feto-mane, kiik-boot, ferik-katuas ho objetivu ida de’it mak ukun rasik-aan, tanba ne’e ho komemorasaun ida-ne’e atu valoriza no fó onra ba eroi sira.
“Tempu agora tenke servisu, servisu no servisu atu atinje mehi saudozu sira-ne’ebé mak husik hela mai ita, tanba sira-nia mehi labele atinje. Ohin, Timor-Leste ukun-aan ona, buat hotu ne’ebé FALINTIL sira halo la’ós fasil hanesan saida mak ita halo agora. Sira, fó sira-nia vida tomak ba Timo-Leste nia independénsia, sira mate balun ruin buka la hetan, balu mate to’o agora lahetan sira nia restu mortál. Tempu to’o ona, ita sira-ne’ebé moris atu halo dezenvolvimentu liuhosi ita-nia matenek no kapasidade tomak hodi lori Tmor ba iha futuru ne’ebé di’ak,” nia dehan.
Jornalista : Osória Marques
Editór : Cancio Ximenes
