Servisu Saúde Covalima distribui ona ai-moruk ba sentru saúde sira
COVALIMA, 21 agostu 2023 (TATOLI)–Diretora Servisu Saúde Covalima, Maria de Fátima Moniz, hateten Servisu Saúde Covalima, distribui ona aimoruk vitál no esensiál ba sentru saúde neen (6) iha munisípiu Covalima.
“Tipu ai-moruk vitál no esensiál balun ami responde ona, hafoin “stock out” iha momentu ita submete pedidu hosi rejionál distribui mai ona munisípiu no ami distribui tutan ba sentru saúde-sira iha Covalima, falta de’it sentru saúde Fatumea. Ami seidauk halo distribuisaun tanba kestaun transporte,” Maria de Fátima Moniz hateten ba Agência Tatoli iha resintu AMC, Sukaer Laran, segunda ne’e.
Servisu Saúde Covalima halo ona distribuisaun ai-moruk ba sentru saúde Fatululik, Maucatar, Suai, Tilomar, Zumalai no Fohorem, ho tipu ai-moruk esensiál hanesan ai-moruk ne’ebé liga ba ai-moruk emerjénsia presiza lalais hodi bele salva ema-nia vida.
Ai-moruk esensiál hanesan {aracetamol, Amocilin nia “stock out” bele liu loron15 bele haruka pedidu hodi buka tuir no ai-moruk non esensiál hanesan salep sira “stock out” mós la problema bele haruka pedidu ho durasaun tempu kle’ur, tanba la fó impaktu ba ema-nia vida
Daudaun ne’e, servisu saúde seidauk halo distribuisaun ai-moruk ba sentru Fatumea, razaun seidauk iha sesta semana kotuk, iha atividade seluk hanesan uza karreta hodi fó avizu ba komunidade no mós halo limpeza, nune’e ohin (21 agostu) la konsege tanba iha atividade.
Tuir planu, servisu saúde Covalima sei distribui ai-moruk esensiál ba sentru saúde Fatumea iha 22 fulan-agostu no sei halo monitorizasaun ba implementasaun programa merenda eskolár.
Antes ne’e, tipu ai-moruk item 98 “stock out” iha farmasia servisu saúde Covalima hanesan tipu ai-moruk vitál, esensiál ho non esensiál ne’ebé daudaun ne’e hahú halo distribuisaun ba sentru saúde sira.
Entertantu, Governu liuhosi Ministériu Saúde estabelese ona Sentru Saúde hitu iha postu Administrativu Fatululik, Maucatar, Fohorem, Fatumea, Tilomar, Zumalai no Suai ho estabelese ona postu saúde 24 iha munisípiu Covalima.
Jornalista : Celestina Teles
Editór : Cancio Ximenes
