DILI, 23 agostu 2023 (TATOLI) – Empreza telekomunikasaun Telemor iha Timor-Leste kompleta ona tinan 11 iha loron 22/08, tema ba selebrasaun ne’e mak “apresia”.
“Telemor organiza eventu B2B ho nia tema “apresia” atu agradese ba Governu Timor-Leste no kliente hotu ne’ebé introdúz mós solusaun ICT foun ba empreza sira iha Timor-Leste tanba ita hotu hatene katak mundu agora sai ona dijital ho nune’e presiza duni prezensa servisu dijitál sira iha mundu modernu”, CEO Telemor iha Timor-Leste Tran Van Bang dehan iha aniversáriu Telemor nian ne’ebé hala’o iha Salaun Grupu Media Nasionál (GMN) Bebora Dili, tersa kalan.
Tanba ne’e, Telemor koko lori solusaun dijitál barak liután ba Timor-Leste ho esperansa atu kria komunidade dijitál iha Timor-Leste.
“Ami fiar katak moris sei fasíl liu no fasíl liután bainhira ami iha prezensa servisu dijitál iha nasaun ida ne’e”, CEO dehan.
Iha aniversáriu ne’e, Telemor prepara ona programa oioin no promosaun boot ba nia kliente sira hanesan, promosaun Lucky Spin, promosaun ida-ne’ebé permite kliente sira atu manán prémiu atrativu barak hosi Telemor. Telemor Fintech mós fornese 100% promosaun ba kliente sira ne’ebé sosa pakote internét iha aplikasaun mosan.
Aleinde ne’e, atu komemora aniversáriu ba da-11, Telemor lansa loja Telemor foun iha Timor Plaza Dili hodi atualiza ba kliente sira hodi ba no bele senti esperiénsia foun hosi loja Telemor.
Telemor mós harii Athena iha árca remota Covalima Fatululik hodi suporta ema sira asesu ba internét, Telemor mós hanesan operadór telekomunikasaun dahuluk ne’ebé lasan eSIM iha Timor-Leste.
Hafoin tinan 11 iha Timor-Leste, Telemor nafatin la’o ba oin, no Telemor iha kompromisu atu fornese solusaun inovativu no servisu esepsaun ba nia kliente sira.
Telemor sei kontinua investe iha nia povu, prosesu no teknolojia hodi asegura katak Telemor sei nafatin iha indústria nia oin.
Telemor mós lidera implementasaun produtu teknolojia foun sira hanesan 3G, 4G, no 4G+, nune’e mós fornese servisu e-wallet no sai parseiru Facebook, Google, no Tiktok iha Timor-Leste.
Telemor mós nu’udar operador rede dahuluk ne’ebé lori esperiénsia dijitál ne’ebé seidauk akontese antes ne’e ba utilizadór sira ho produtu sira hanesan loja filme webfilme-lokal-Cinema.tl, televizaun movel Timor-Leste, mosan e-wallet, no aplikasaun super Kakoak.
Liuliu, realizasaun hirak-ne’e mós hetan rekoñesimentu hosi Estadu no Governu Timor-Leste.
Iha tinan 2017, Telemor hetan onra ho Medalla Onra ba Telemor nia atividade no kontribuisaun pozitivu ba dezenvolvimentu komún nasaun nian.
Iha tinan 2019, ho servisu e-wallet Mosan, Telemor hetan rekoñesimentu nu’udar “Best Financial Institution of the Year” hosi Banku Sentral Timor Leste.
La’ós de’it ida-ne’e, Telemor mós kontribui ona ba imajen internasionál Timor-Leste nian iha área teknolojia nian, tanba Telemor nu’udar kompañia boot iha Timor hodi partisipa no manán prémiu nternasionál ne’ebé prestijiozu. 4 International Business Awards iha 2014, 2015, 2020, no 2021, 2 World Communication Awards 2015 no, foin lalais ne’e, IT World Awards Juñu 2022.
Prémiu internasionál osan-mean hosi p Globee business award ba kategoria tolu hanesan, Agency of the year for IT (advertising and Marketing) iha maiu 2023 ne’e, iha tempu ne’ebá, kolega internasionál sira hatene liu tan kona-ba nasaun joven hanesan Timor-Leste iha mapa teknolojia.
Jornalista: Hortencio Sanchez
Editór : Zezito Silva
