Governu halo konsultasaun públika diploma ministeriál ruidu ba emprezáriu Covalima
COVALIMA, 22 agostu 2023 (TATOLI)—Governu liuhosi Sekretária Estadu Profisionál no Empregu (SEFOPE) hala’o konsultasaun públiku diploma ministeriál ruidu no sinál ba emprezáriu lokál, internasionál ho traballadór sira iha munisípiu Covalima.
“Ita halo konsultasaun diploma ministeriál ruidu no diploma ministeriál sinál atu kompleta lei seguransa saúde no ijiene iha servisu fatin. Tanba, atu implementa lei, presiza iha diploma atu regula iha servisu fatin,” Diretór Gabinete Júridiku SEFOPE, Carlito Rosário Cabrál, hateten ba jornalista sira iha salaun AMC, Sukaer Laran, tersa ne’e.
Konsultasaun ne’e foku liu ba bainhira iha servisu fatin barullu hodi afeta ba ema-nia saúde liuliu traballadór nia tilun, tanba kompañia sira iha mákina boot halo lian makaas hodi afeta ba traballadór sira-nia saúde.
Ho nune’e, kompañia-sira bele distribui ekipamentu ba traballadór sira, nune’e labele fó impaktu ba traballadór sira-nia saúde.
“Ita ko’alia diploma ministeriál ruidu, entaun emprezáriu sira tenke fasilita ekipamentu protesaun ba trabaladór sira, nune’e labele afeta ba traballadór sira-nia saúde tilun,” nia dehan.
Konsultasaun diploma ministeriál kona-ba sinál, hanesan hala’o konstrusaun bainhira iha fatin perigu tenke tau sinál ruma, nune’e labele fó impaktu ba ema-nia vida
Programa konsultasaun públiku ne’e, Governu foin dahuluk hala’o konsultasaun iha Covalima hafoin sei kontinua iha munisípiu sira seluk.
Molok atu halo elaborasaun diploma presiza rona ema hotu nia aspirasaun, nune’e lei vigór ona ne’e ema hotu bele kompreende lei ba traballadór, iha setór públiku no privadu.
Aleinde halo konsultasaun públika, Governu mós hala’o sensibilizasaun lei númeru 11/2023 ko’alia kona-ba seguransa saúde ijiene iha servisu fatin ba emprezáriu lokál no internasionál iha Covalima.
Razaun Governu presiza halo sensibilizaun ba emprezáriu sira, tanba emprezáriu-sira mak aplika ba traballadór ne’ebé servisu iha sira-nia kompañia, atu asegura traballadór iha kondisaun seguru, saudavél no iha mós ijiene nune’e traballadór servisu ho saudavél
Inspetór Jerál Traballu (IGT), Frederico Perreira de Matos, hateten ekipa mai halo konsultasaun públika kona-ba diploma ministériál sinál no ruidu, hodi rona ideia hosi emprezáriu loká, internasionál no traballadór iha Covalima.
‘’ Atu reforsa lei seguransa saúde ijiéne traballu iha servisu fatin, hanesan diploma ministeriál ruidu no sinál, ami tenta hetan konsultasaun iha munisípiu sira ho traballadór no empregadór, iha ideia balun ita bele tau hanoin hamutuk hodi kompleta ho ideia hosi munisípiu, tanba sira mak hasoru,” nia hateten.
Governu hala’o konsultasaun públika, tanba durante implementasaun traballadór no empregadór mak hasoru iha terreñu ne’e iha balun sei falta, nune’e presiza atu kompleta ideia hosi empregadór iha munisípiu
“Ho nune’e, bainhira traballadór servisu laiha sinál no ami servisu barullu oinsá atu haree kona-ba ida-ne’e. Governu bele kompleta, ami hetan ideia hodi hariku diploma ne’e aprezenta ba ministériu kompetente bele reforsa lei númeru 11/2023,” nia hateten.
Aleinde ne’e, Governu finaliza sensibilizasaun lei númeru 11/2023 iha Covalima kona-ba saúde no ijiéne iha servisu fatin, sei kontinua hala’o konsultasaun públika ba iha munisipiu sira seluk hodi kontinua rona ideia hosi traballadór no empregradór-sira
Jornalista : Celestina Teles
Editór : Cancio Ximenes
